İ dafo Deutsche Welle mawdacla urdufyo cala mşihoye b’Turkiya heş kımdawım

İ dafo Almanoyto d’Deutsche Welle mawdacla, dcıl mıd kıtyo britho jğuşto ucdo bu virus d’Corona, elo a Mşihoye heş kımdawmi a rdufye aclaye b’Turkiya, u grışleste u zuhoro cala Suryoye dıkzayci cala zedqathe ucala mulkonathe mi şultonutho d’AKP.

 Bebzabno, Deutsche Welle bu taşroro dıfrısla mawdaclaste, dhedor 200 alfo Mşihoye mgalwelın ma dukothathe bıthır mu hjomo haroyo dsımla Turkiya calu garbay madınho d’Suriya.

 İ dafo Almanoyto d’Deutsche Welle bu taşroro dıfrısla lu tbocofroso mırla; Turkiya kcayşo ucdo bgawe dıhboso momunoyo mi celtho du virus d’Corona, ube bzabno u momunayda nafıl wi batilutho da şuğlone zayido bu athro. Elo i şultonutho d’Ankara kmıstacımlo i aykanoyutho ducdo leşan dsaymo hboso cala qalilotho tawdithoye.

İ dafo Almanoyto mawdaclaste du dyoşo dcala Mşihoye b’Turkiya latyo mede hatho leşan u rişqutno Erdoğan, dilonoyith di cito d’Aya Sofya dkıtyo hıdo ma citotho qadmoye dıbritho, kmisım acla hboso rabo adyawma leşan dmişahılfo l’masığdo. Bebzabno, Deutsche Welle grışla u zuhoro cala Suryoye dıkhoyın dilonoyith bu qlimo d’Turabdin, dıba eşne haroyani fayış kzayci cala zedqathe ucala mulkonathe bu zabno dıkloqın rdufye mi şultonutho d’Erdoğan.

Deutsche Welle maglelaste calu qedomo tuxmonoyo di şultonutho d’AKP mqabıl da Mşihoye, u xıd mathlo d’Ankara mahıtla arcotho u mulkone da Suryoye bışme  d’farsufe hrene dlatne Mşihoye, ube bzabno menyono celoyo d’citotho shifi bi netije da taxtuşe dhawın beyn Turkiya wa Kurdoye. Camgabıdathe, i dafo grışla u zuhoro calu hjomo haroyo dsımla Turkiya calu garbay madınho d’Suriya, u dhawi celtho li golutho dhedor 200 alfo Mşihoye ma dukothathe, u holucdo laybın ducri la botathe cal du qrobo kımdawım.

Lfuth Deutsche Welle, Erdoğan huwole şudoyo dıgdobe fsoso lu bnoyo da citotho, elo kmahwe di siyase du furşono mtakso mqabıl di qalilutho Mşihoyto d’Turkiya, kımagılyo b’şıkıl qriho d’Ankara latyo jıddi u şarırto dmadcıro a haye tawdithoye da Mşihoye lu kyonathe.

Camgabıdathe, i dafo mşalatle bahro calu msoko du rişdayro d’Mor Yacqub Qarne dayroyo Aho Belijan dmahıt bu hbuşyo d’Mırde bi dacwa dkıtle esore cam grub marıhbono, u hatheste cal dhuwle maye u lahmo lhın Mharbone Kurdoye dıdıqwolın u tarco di dayrayde. İ dafo Almanoyto bu huthomo du taşrorayda mırla; A Mşihoye d’Turkiya hawın u debho du qurbono bi rocyutho di şultonutho d’Ankara.