I folhutho d’Lebnon bdela bu teltimo da zayne da ğrobe Fleştoye
Hayle Lebnonoye cabiri li maşritho da Fleştoye d’Burj Al-Barajneh dkıtyo bu taymno d’Beyrut u bdelın dmalimi a zayne da Fleştoye. Hathe i hamle qamayto dımbayanla i şultonutho’yo bnişo dlo foyış zayne mbarbıze bu athro. U mathlono d’Amerika b’Lebnon Thomas Barrack’ste, mhanele i dawsathe dımhalqo mi şultonutho d’Beyrut.
BEYRUT — Athmıl casriye mşarelın a hayle d’Lebnon, bu teltimo da zayne qamoye dmaslımi bi maşritho da galwoye Fleştoye dkıtyo b’Beyrut. A zaynani malimi bu taro du fusqono dmıdwola i şultonutho d’Lebnon 5 bu yarhano, bnişo dmitaşlıhi a ğrobe msalhe kulle ma zayne dkito acmaye uda zayne kulle dfayşi bide di dawle.
21 bu yarho İyor dşafıcina’ste drişowa i sbutho du teşliho da zaynani b’Lebnon, bi ytawto dhawyo’wa beyn du rişquno Lebnonoyo Josef Aoun udu rişono da Fleştoye Mahmoud Cabbas. Calathe’ste u rişwazire d’Lebnon Nawaf Salam mhanele i hamlathe i qamayto dmabdıyo u dfoyış u zayno kule bide du gayso du athro.
Bebzabno u mathlono d’Amerika b’Lebnon’ste mawdacle i fsihuthayde dmabdıyo ucdo i hamlathe da zayne u mırle; Hathe tarmitho makthabzabnoyto caşınto’yo leşan u huyodo Athronoyo uli mşaynutho d’Lebnon. U mşalo di sictho dımbayanla i şultonutho d’Lebnon leşan u dialog beyn Lebnon wa Fleştoye-Ramez Dimaşqieh mawdacle, dğer ğrobe hrene msalhe di maşrithathe d’Burj Al-Barajneh gıdmaslımi a zaynathe ba kmo şabe dothe u leşan a fulhonani’ste, mbayanle u gayso d’Lebnon lohyotho da ğrobe dgımaslımi a zaynathe.
Elo Hamas u zawco Maşılmono da Fleştoye rfıde u fusqonano dmaslımi u zaynathe. B’Lebnon kito adyawma 12 maşıryotho da galwoye Fleştoye mbarbıze b’Beyrut ubu taymnayde, b’Bekaa ubu garbyo ubu taymno du athro. İ maşritho rabtho dkulle’ste b’Cayn al Hılwe’yo. Emwotho Mhaydotho kısaymo taxmin dkito hol 500 alfo galwoye Fleştoye b’Lebnon.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
