İ Golutho du camaydan mu Ciraq

A’Mşihoye d’Mawsal trelın a’citothaththe, a’botaththe wa mulkonaththe u trelınste a’cuhdonaththe wu makthabzabno dkıtwolın bi mdithathe i catıqto, cal da şutose di şultonutho du Ciraq lıqadiri dsaymi u sutoro da Mşihoye mu tukoso marıhbono dı Dacış dıkbışwole Mawsal bi şato da 2014. Elo u Ciraq bu zabno dqadırwo dsoyım u huroro da n’arcothayde m’Dacış bi şato da 2017 ubi methcadronutho du koalisyon emwothoyo, hın ma yaqrotho Mşihoye d’Mawsal udi daşto d’Ninwe daciri la botaththe, elo i sagiyuthaththe mgalwelın l’fenyotho dkıtne zıd mşayne dilonoyith lu qlimo d’Kurdistan bu garbiyo du Ciraq.

Bu taşroro dıfrısle u ajans da tebe d’Anadolu bu calway “a’Mşihoye du Ciraq, golutho dlatyo bu sebyono u dcoro dkıtyo casqo”, sim maqıblınwotho cam hın mşale d’şutose u rişone d’marciyotho tawdithoye du camaydan. Baynothaye u rişono du waqıf da Mşihoye du Ciraq Racıd Jalil Kaçaçi mırle l’Anadolu “kito ğalabe celotho dımcadarlın i şalqa di golutho da Mşihoye mu Ciraq”. Kaçaçi mawdacle ste di aykanoyutho haruto folitiqoyto udi mşaynutho, i qale dkito bayn da mathhabe wu bırbozo da tukose marıhbone hani kulle celotho di golutho da Mşihoye mu Ciraq ne.

Bebzabno, Kaçaçi mawdacle dlıkmıtyaqın dkibe dıdıcri a’Mşihoye galwoye lu athro, cal di sagiyuthaththe mzabanlın a’mulkonaththe u hawi casqo u dcoraththe naqla hreto. U rişono du Waqıf da Mşihoye du Ciraq mathkarle ste du menyono gawonoyo da Mşihoye du athro baynothaye u qlimo d’Kurdistan lıkşofıc adyawma a’500 alfo farsufe.

M’gabo hreno, u rişono di marcitho Kaldoyto d’Kerxıslox (Kirkuk) udi Slemaniye hasyo Mor Yusıf Tuma mawdacle l’Anadolu di bsirutho du menyono da Mşihoye i celtho du sxoro da citotho wa, u mırle “i tuhmonoyutho bu Ciraq hdo ma celotho rişoyeyo di golutho da Mşihoye mu athro. U dcoro da Mşihoye lu Ciraq masroyo cam menyono d’sebwotho, ubi qadmoyuthaththe u dawro rişoyo dıknofıl cali şultonutho dıklozım dmawfıqo qonune dıkmınci dmisım hçome u frişutho cala Mşihoye, uklozım ste i şultonutho dımmaşyo siyase dıkmaqwiyo i nahirutho du kenşo”.

Mxasra hreto, Okar Zayya dkıtyo farsufo mu camaydan dıkhoye bı Boğdod, bi maqırhonutho dhule l’Anadolu mawdacle di şişaltho da hçome dıkmisomi cala Mşihoye du Ciraq kıtlın makthabzabno yarixo dıkdocır li şato da na’1930.

U komisyon du Ciraq da zedqe noşoye bu taşrorayde di şato da 2021, mathkarwole dıqtılwo bu Ciraq 1315 farsufe bayn di şato da 2003 huli şato da 2014. Ucamgabıdathe mgalwewole 130 alfo u htıfwo 161 hrene bu zabno dıkbışwole Dacış i mditho d’Mawsal bayn di şato da 2014 huli şato da 2017.