22/08/2025

I mditho d’Enköping giduwyo qentrun du lojistik du NATO

U athro du Swed wi mdito d’Enşöping mbayni xıd qentrune lu huyodo du NATO leşan dqodır dımşadır folhe lan athrawotho d’Skandinavia u l’Amerika. U fusqonano, mıdla athmıl i şultonutho du Swed ubu mamlo dsımle u waziro du sutoro Pol Jonson mırle; A thumaydan kmıştacın dawro rabo leşan u NATO dqodır dmahwe u haylayde u dsoyım u duyoqo di mşaynutho da hadomayde.

22/08/2025

ENKÖPİNG, Swed — U waziro du sutoro du Swed Pål Jonson huwle maqırhonutho cali netiçe du droşo dhawi beyn du NATO udi şultonuthayde wu fusqono haroyo dmid. Bu fusqonano, kmitahwe aftho lu NATO dmıstacmıl i mdito d’Enköping u gawonoyith u Swed xıd qentrun du şedoro da folhe lan athrawotho d’Skandinavia, Britania u l’Amerika.

U Swed wi mdito d’Enköping, gıdmitıstacmıli’ste mu NATO xıd qentrun du lojistik. Ubi foquduthathe d’Enköping, gıdmibayın hol 70 cawode leşan dmaşın a fulhonani-du NATO; xıd mathlo nqolo du mazot, zayne, buğre uğer. Jonson mırle; U Swed wi jeoğrafiyayde kıtte dawro ulsoyo leşan u NATO dqodır dmahwe u haylayde u dsoyım u duyoqo di mşaynutho da hadomayde.

Mawdıc b’senario dqrobo, klozım u NATO bi qamayto dqodır dnoqıl folhe me Amerika la lmine d’Norweç ume tamo lu Swed ulu yamo d’Baltik, leşan u snodo d’Finland udan athrawotho hrene du garbyo d’Urifi dkıtne qariwe la thume d’Rusya. U waziro Swedoyo mırle’ste; Klozım dmitaqwıyo i aykanoyutho di mşaynutho folitiqoyto bnişo dqudrina xayifo dsaymina harake mu macırbo lu madınho.

U qentrunano gıdmıştace dawro rabo bnişo dmitxifi a fulhone u leşan dlowe sabotage u hçome du cyber, klozım dmimıd tedbire di mşaynutho. U gayso du Swed bıdele bu tuyobo du plan du qentrunano du NATO. U qentrun rişoyo du lojistik du NATO kıfoyış bi mdito d’Ulm d’Almanya. Cayni şıkıl d’qentrun dgımitahıt b’Enköping, gıdmitarkıwi’ste b’Brunssum d’Hollanda ubı Neapel d’İtalya.