İ mdito d’İznik b’Bursa (awkith Niqya) sımla baytoyutho lu duxrono şatonoyo dan alfo u şwacmo eşne, di sunadus qamayto dsimowa

BURSA (NIQYA), Turkiya – Bi şato d’325 bıthır me Mşiho, malımwole u qaysar Kostantin l’knuşyo beyn da citotho da Mşihoye. Ucdo şafıc 1.700 eşne calu knuşyano u tawdithoyo dsımwo bi mdito d’Niqya b’Bursa d’Turkiya-dışma bu Turkoyo İznik’yo. Calathe’ste meqım kmo yawme, layim taşdaryotho u mathlone d’citotho mşahılfotho dbritho bi mditathe.

Mi cito Suryoyto Orthodoksoyto’ste hadır bu yawmano u dilonoyo u efetrufo fatıryarxo Mor Poliqarpus Augin Aydin mi marcitho d’Hollanda, malfono Gabriel Malas me Britania uğer farsufe mu camaydan leşan dmathkıri u duxrono şatonoyo dan 1.700 eşne di Sunadus qamayto dkıtle ulsoyutho rabtho li cito.

Bi tahrazto du duxronano’ste camgabe da mamle frişe dsimi cali mıcne du knuşyo, sımwo’ste socurwotho frişe; beynothaye u tarco d’Lefke, i bethcatiqotho d’İznik uli cito d’Hagia Sofia dsimo’wa masığdo ubu matcımo dkıtyo bi mdito, sim slutho mşawtafto. Dafe frişe dımtahqable u yawmano, sımlın maqıblonutho cami mcalyutho du hasyo Augin Aydin, dmawdacle dkıtne fsihoye dqadiri dhudri u dkurxi a dukothani a ulsoye u makthabzabnoye.

Mawdıc’ste dkito mkono du Papa hatho du Vatikan wu fatıryarxo di cito Suryoyto Orthodoksoyto dsaymi socurutho li mditathe bıthır kmo yarhe. İ mditathe mşatsowa mu rabhaylawotho d’Skandar u Rabo-Antigonos ba 316 meqım me Mşiho u mşahlıf ışma l’Antigonia. Bu zabno du şultono d’Lysimachos, mşahlıf ışma l’Niqya. İ mdito dfayito lide d’Roma, hawyo’wa nuqazto tawdithoyto u sımwo 325, i sunadus qamayto u d’drışwo eba-Yeşuc Mşiho manwe u mahıtowa i arcutho di Tlithoyutho qadışto.