İ paketa du gumruk di Donald Trump fayito la haye

WASHINGTON – Meqım şabtho, mawdacwole u rişono Amerikoyo Trump i paketa du gumruk dmahıtle calu mal dhol 60 athrawotho frişe dbritho, wu adyawma safrayto’ste, mafito i paketathe la haye u kmifaşqo-xıd hdo ma qaşye rabe dhawyo bu zabno modern di noşutho. Ba hfuxye dmahwelın an athrawothani’ste mawdace, dıkmtaybi ruhaye dmahti cayni timo d’gumruk cal Amerika.

U timo du gumruk dmahıtle Trump frişo cal athrawotho mşahlıfe; mathlo mahıt gumruk d’20 % calu mal dıkcobır l’Amerika mu Huyodo d’Urifi wu athro du Sin dmahıt acle gumruk d’104% m’athır bu zyodo mi hamlathe d’Trump. İ paketathe du gumruk, gıdçubro mınyono celoyo d’şırak dsuxri a tarcathe u calathe xliq hfuxye b’britho kula u m’atharla mrimono cali borsa dbritho.

İ sagiyoyutho du mal dıkcobarla Amerika mu Sin’yo uba 2024, zwınwola Amerika mal b’timo 440 milyare dolare u calathe ucdo, kmıntır d’mınyono celoyo d’mal dımıstacmıl u camo Amerikoyo dcole u timayde ğalabe; mathlo du medano u mobil di ido-Iphone, u elektronik uğer. U gumrano’ste gıdm’athır mrimono calu momuno du Sin. İ sbuthathe du gumruk dmahıtle Trump, xlıqla hfuxye rabe beyn da farsufe catire d’Amerika’ste dım’athri mu nhoto di borsa.

A 500 farsufe catire dbritho bıdelın dorşi me hatho a esorathe cam Trump. Beyn dani kito u rişono di şırke d’Gamestop Ryan Cohen dıkmawdıc, u momuno global gıdnohıt mcal fothe du matematik-du hşowathe dlatyo towo. Bebzabno bıgawe du gabo da Qutnuthoye’ste kıcole u ton mqabıl d’Trump-xıd Susie Wiles wu waziro du momuno Scott Bessent, latne thnihoye cali paketathe dkiba dmahrıwo u momuno d’Amerika.