I saqibloyutho d’Suriya mahwela hfuxyo mqabel di ytawto d’Mosko bayn Turkiya u Suriya, kimmo “ahna lıgıdsaymina şbuqyo camu rejim dkıtyo qatolo”

İ şultonutho zabnoyto di saqıbloyutho d’Suriya dıkmısnodo m’Turkiya, mawdacla du rejim d’Alasad qatoloyo, ulaybe dmisım acme esore kyonoye. U rişono di şultonutho zabnoyto di saqıbloyutho Cabdılrahman Mustafa bi maqırhonutho dhule l’North Press mırle “i şultonutho zabnoyto wu koalisyon athronoyo d’Suriya loksaymi mudaxala ba sebwotho gawoye da n’athrawotho, mawxa ste u mede ulsoyo laşanayna u qedomo da n’athrawothani aydarbo kibe dhowe li sbutho d’Suriya yo, awkith u qedom o da n’athrawothani lıkkowe dhowe celtho dmanhıtina katfo mcala timoyotho thabute du qawmaydan”.

Bebzabno, Mustafa mathkarle di saqıbloyutho d’Suriya lıkrıfdo u şroyo folitiqoyo, elo hiya hfittoyo b’şıkıl msimono bu maşıqlo du şroyo du kriz d’Suriya. Mustafa mawdacle ste du şroyo d’Suriya folitiqoyo yo ulatyo folhoyo xdu mede dkobıc u rejim d’Suriya wa bnayqyomayde Rusya wu İran.

Camgabıdathe, Mustafa makadle di şultonutho zabnoyto di saqıbloyutho masırtoyo cama fusqone emwothoye ubi qadmoyuthaththe u fusqono da 2254 dkıtyo dilonoyo calu şroyo folitiqoyo d’Suriya.

Bıthır mi ytawto dhawyowa bi mditho d’Mosko bayn da wazire du sutoro d’Rusya, d’Suriya udı Turkiya, a’mathlone du koalisyon athronoyo saqıbloyo, i sictho da bazare wi şultonutho zabnoyto, laqınwo u waziro di baroyutho dı Turkiya Mawlud Çawuşöğlu. Bıthır mi ytawtathe, a’mathlone di saqıbloyutho mırwolın lu tboco froso “dı Turkiya lıgıdtıryo menaye mqabıl da n’esorayda cam Darımsuq”.