İ şultonutho d’Almanya makadla cali lohitho da ışmone d’Turkoye saqıbloye

İ şultonutho d’Berlin makadla, cali lohitho da ışmone d’Turkoye saqıbloye dıkhoyın adyawma b’Almanya.

Mawdıc da farsufani dkıtne bu zyodo gelyunore saqıbloye d’Ankara, mahti bi lohithathe leşan u qatlo.

Cali egartho du şwolo dımqadamwola i qoyumto Evrim Sommer lu parlamento d’Almanya, ucdo i şultonutho federaloyto makadla d’Turkiya kıtla lohitho dışmone d’saqıbloye Turkoye dıkhoyın ucdo b’Almanya, dmahti nişo dmıqtoli.

Hathe inaqla qamayto di şultonutho d’Berlin-bu darbo di wazirutho di gawoyutho du athro, kmıjğolo cali şrorutho di lohithathe dkiba mınyono d’ışmone d’gelyunore u Turkoye hfite dıkhoyın b’Almanya. A farsufani mahti bi lohithathe leşan u qatlo.

İ wazirutho Almanoyto dım’akadla cali sbuthathe dfris ğalabe tebe bu tbocofroso du athro mırla; Kito luhyotho frişe d’ışmone d’farsufe dıksaymi sturyo i şultonutho d’Erdoğan. Bhdo ma luhyothani’ste kito ışmone d’55 farsufe dıkhoyın adyawma b’Almanya-beynothaye’ste u zamoro Ferhat Tunç, gelyunore d’Artı tv, Arto Gerçek uğer

Calathe u tukoso Almanoyo du Sutoro da Gelyunore, sımle qroyto li şultonutho dsaymo u duyoqo di mşaynutho da gelyunore Turkoye u mırle; Hzelan taşroro cali lohithathe b’mğaltho digital d’Almanya u bıthır mıd mqafyo, griş u zuhoro acla bu tbocofroso du athro.

U polis Almanoyo’ste, hawile esore cam hın ma gelyunorani dhowın mahise u dmaydi a tedbirathe. U tukoso da gelyunore d’Almanya tlıble mu polis dımhame a hawronathe u sımle qroyto l’Turkiya dmaqimo u hboso wu dyoşano dcali hirutho da gelyunore.