Trump mbarele ruhe ma thome du Bethdino

U rişono d’Amerika Donald Trump, mbare ma tre thome dımqadmiwo mqabıl dide bu bethdino dilonoyo dsımwo ele bu Senato du athro.

Bu quwolo dsim bu Senato, 52 snıdde u fusqono u 47 rfıdlın dmibare Trump ma thomani. İ netiçe du quwolano’ste dmıntoro’wa, gıdhuwyo ucdo mawthronitho l’Trump bi kampanya da guboye di rişonutho d’Amerika.

U bethdino dsim leşan u rişono d’Amerika, mıdle hani zabno duktho bu tboco froso Emwothoyo wu athmıl casriye, mid u fusqono haroyo du bethdininano dsim bu Senato du athro-dkıtyo bi sagiyutho du gabo da Qutnuthoye. Bu quwolo dsim calu thomo qamoyo-dmıstacmele Trump i mşaluthayde lo qonunoyith-52 m’ayade u 48 rfıdlın.

Bu quwolo du thomo trayono dkıtwe-d’Trump maklele a fulhone di kongre-53 mırlın E, u 47 mırlın Lo. Leşan dmitadre’wo Trump, klozamwo u snodo d’2 ma 3 sahme di sagiyoyutho du Senato. U senator Qutnuthoyo Mitt Romney nafıq mqabıl du gabayde bu quwolo qamoyo.

Wa Senatore Demoqratoye kulle msimone’wın, dmitadre Trump ma 2 thome dımqadmi mqabıl dide u dmimıd mi wolithayde. Elo bi netiçe du quwolano, mbare u rişono Amerikoyo bu bethdino wi rişonitho du Mawtbo tahtoyo Nancy Pelosi mırla; Cali xyene dsımlın a Qutnuthoye mqabıl du nomuso du athro, gıdmdawım u rişono dhowe qento mqabıl di demoqratoyutho d’Amerika.

U senator Qutnuthoyo Mitch McConnell mfaşaqle i zoxuthathe d’Trump xıd husrono folitiqoyo rabo lu gabo da Demoqratoye u mırle; Hınne mıdde u inisyativ du medano u mıftakarlın dkıtyo renyo towo. Elo u inisytivano, fawdo folitiqoyo rabo’we. Ucdo kıtle Trump mkono towo la guboye dothe.

A Demoqratoye thımwolın Trump, dmaklele mcadronutho folhoyto l’Ukraina. Lfuth a thome, u nişo du camlano dsoyım hboso calu athro, leşan dsoyım buhono mqabıl du abro du mraşho saqıbloyo d’Trump-u demoqratoyo Joe Biden-Hunter Biden’we. U bethdinano d’Trump hawi da 3 bu makthabzabno du athro. Ban 1998 sımwo bethdino lu rişono Bill Clinton, uban 1868 sımwo bethdino lu rişono Andrew Johnson wa 2 rişonani’ste mbaranwo bu Senato.