İ wazirutho di gawoyutho du Cıraq mıncla u tuyobo da tagliyotho kulle beyn 11 uhol 20 bu yarhano d’İyor, bu zabno dgısaymo Boğdod baytoyutho lu knuşyo du Huyodo Caraboyo

BIGHDOD – Boğdod lo kobo aftho l’ayya farsufo aw ğrob mu kenşo Cıraqoyo, dsoyım tagliyotho bu zabnano dımqarawle u knuşyo du Huyodo Caraboyo-d’adşato u Cıraq mıdle i mşalutho dsoyım i baytoyuthayde. Calathe me adyawma wazolo uhol 20 bu yarhano, u polis Cıraqoyo lo kobe aftho l’tagliyotho b’Boğdod ukull protesto dmisım’ste bu zabnano dımbayın, gıdmifaşıq lo qonunoyo.

Bi hedriyathe Boğdod, kubco dmahwıyo i hiyoyuthayda i marduthoyto u makthabzabnoyto u bebzabno dmahwıyo u dawro di rişonutho stratejikoyto du Cıraq bi britho Caraboyto. Bu taro di hedriye dsim lu knuşyano du Huyodo Caraboyo, mtayabla Boğdod mınyono celoyo d’tarmıyotho du tendifo, du bnoyo udu hethotho di mdito u maqwela a haylayda di mşaynutho.

Hathe’ste cal bu knuşyano du Huyodo Caraboyo gıdhodarle malke, Amire u rişone frişe dan athrawotho Caraboye, u gıdmıkle cal sebwotho frişe; beynothaye i aykanoyutho du Madınho Mescoyo, i klayto mhayadto dan athrawotho Caraboye. Bi hedriyathe dsimo’ste, mcalqo i otho hathto d’Suriya uğer luhyotho dıkmıstaqbıli i taşdarto d’Suriya ba darbone di arişkoyto walaw heş i şultonutho latyo m’akadto en gıdhudro bu knuşyano.

U rişono zabnoyo d’Suriya Ahmed al Şarıc tlıbwole garantiye me Amerika, leşan dhodır u knuşyano. İnaqla harayto dsımwole u Cıraq baytoyutho lu knuşayno du Huyodo Caraboyo ba 2012’we. U knuşyo qamoyo dkulle’ste dsımwo bu Cıraq ban 1990 meqım mu qrobo du Xaliç’we.