‘İ zuctho d’Erdoğan l’İmamoğlu’yo bıthre du msokano’. Ba melani a mtagliyone kımdawmi dmahwın u hfuxyathe calu msoko d’Ekrem İmamoğlu

TURKIYA – ‘A yolufe bethsawboye mvayaclın u sabrathe bi demoqratoyutho, elo u darbaydan u ihidoyo mi aykanoyuthathe’ste i demoqratoyutho’yo’ ba melani a comure d’Stanbul kımdawmi a tagliyothathe mqabıl d’Ankara dkubco dmaydo u rişono di karxutho İmamoğlu mi wolithayde. Lfuth u mluwo da 127 du nomuso esonoyo d’Turkiya, u waziro di gawoyutho kibe dmoyıd rişono di karxutho mi wolithayde-en dhowe dacwat mqabıl dide. U hathe kuthyo li mıcne, d’İmamoğlu kibe dmimıd qonunoyith mi wolithayde.

Walaw u nomuso komır dkibe dhowe u msoko zabnoyo, elo bu praktik heş lo dacır holucdo rişono di karxutho li wolithayde bıthır ma buqore dsimi acme. Ankara kmıstacmılo i mekanizmathe, leşan dmafito a dukotho kulle lu duyoqayda-dilonoyith da dukotho dkıtne qariwe la Kurdoye. Ucdo’ste kito mkono, dmitahıt noşo b’dukthe d’İmamoğlu bu darbo da guboye qlimoye-en dothe dmıhze İmamoğlu moro d’hawbo.

Cali aykanoyuthathe, u Mawtbo d’Urifi frısle egartho u mawdacle u hfuxyayde calu msoko du rişono di karxutho d’Stanbul u mırle; U msoko d’İmamoğlu kıtocın remzo da rdufye cal folitiqoro dıkmıhze u mraşho rişoyo la guboye di rişqutnutho d’Turkiya. Bebzabno sımla Berlin qroyto la bnaymothoye dlızzın ucdo l’Turkiya mu qento di mşaynuthathe ma hbose dıksaymo Ankara cala saqıbloyayda.

Bu zabno du msoko d’İmamoğlu wa tagliyotho dhawın, mahıtwo mnoco du isticmal da dafe frişe di sosyalmedia, elo u camo naqla hreto lo şamıc u mıstacele a dafayde, leşan dmawdıc u hfuxyayde cali lo kinutho dkito bu athro. Wu adyawma, mawdıc dmaqimi naqla hreto a tedbirani dcalu isticmal di sosyal media. Bu zabno du mnocano, msıkwo’ste 54 farsufe dmıstacemlın a dafathe elo bi qale dhawyo beyn du polis uda mtagliyone’ste, msik ba mowat dıbnaynoşo.  

Elo gawonoyith i sbuthathe d’İmamoğlu xlıqla zmomo rabo uhani kmo yawme, ajanse u dafe Emwothoye rabe; beynothaye; AP, The Guardian, Reuters, CNN, BBC, Le Monde, Deutsche Welle uğer frışlın duktho lu msokano d’İmamoğlu ulu qedomo d’AKP/MHP la folitiqore saqıbloye.