U Mawtbo di Urifi u i wazirto di baroyutho d’Almanya tlıblın dmimıd hşowo ma mşale dcalu qtolcamo dsim bu sforyamo d’Suriya

BRUKSEL/U Mawtbo d’Urifi bu buyono dıfrısle, b’qaşyutho krıhle a’gedşe du cnufyo dsimi ba zabne haroyani ubırwihutho mqabıl da mdinoye dıkhoyın ba mdinotho u qıryawotho du sforyamo d’Suriya. U Mawtbo d’Urifi tlıble ste mi şultonutho zabnoyto dı Darımsuq, dsaymo u garanti du sutoro da mdinoye kulle, udmaydo hşowo ma mşale dacla gedşe haroye du cnufyo, lfuth a’prensibe wa qonune emwothoye. 

U buyono mathkarle ste du Huyodo d’Urifi gdımdawım dıdorış a’mkone dmıtre tedbire zıd mqabıl du athro d’Suriya, lfuth a’şuşote dgıdhowın cali aykanoyutho b’gawıd du athrano. 

M’gabo hreno, i wazirto di baroyutho d’Almanya Analina Baerbock sımla qroyto li şultonutho zabnoyto d’Suriya dmaydo lu duyoqayda a’grube tuhmone dkıtne masre acma udkıtne a’mşale dcala gedşe haroye du cnufyo dhawınwo bi fnitho du sforyamo d’Suriya, udmaydo hşowo menaye. 

Baerbock mawdacla ste dıklozım i şultonutho dı Darımsuq dmıdyo qyome cama mşahılfe d’Suriya dıkdomın lu qyomo dımdewola camu rişono da haylawotho d’Suriya demoqratoyto d’QASAD Madhlum Cabde. 

Baerbock bu knuşyo dsımla lu tboco froso bıthır mi ytawto dhawila camu rişono du maşıqlo folitiqoyo d’Suriya Ahmad Alşarıc bı Darımsuq, sımla qroyto lu fuloğo di şultonutho bnişo drığşi a’came kulle baynothaye a’Druz, a’Callawiye wa Mşihoye dkıtne falqo m’Suriya i hathto. Bawırbuk mawdacla ste di mıştawtfonutho da neşe bi şultonutho hathto gıdhuyo asas du medano, cal da neşe kımşakli 50% ma comure d’Suriya, u mırla “u nişaydan u mşawtfo dlımıtfoko Suriya naqla hreto yo laf qrobo gawoyo”.