Ibrahim Murad: i milişya İranoyto d’Hizballa kımmathlo tehdid baroyo lu rejim d’Lebnon uli ctiduthayde xıd athro

METN, TUR LEBNON, Lebnon — Bi maqırhonutho dhule adyawma li dafo d’Alsiyase d’Lebnon, u rişono du gabo du Huyodo Suryoyo Tibeloyo d’USUP İbrahim Murad mırle “u gabo d’Hizballa latwe yawmo falqo mi tarmitho du bnoyo du athro, elo u rişo asasi we di tarmitho du fırfoso d’Lebnon. I masiruthayde dcamu zayno, udkobıc u qrobo mdarbıd du bnoyo du athro, kım’akdo d’Lebnon bi hzaytayde balhude warqo d’bazareyo li mşablonutho du İran uda muttafikayde, lo athro şaryo dıkşowe u camayde dhoye ebe”. 

Murad mırle ste “u israr dkıtle Hizballa dlımaslım u zaynayde lu gayso d’Lebnon, kımmathıl inqilab qriho calu nomuso esonoyo ucala şutose du athro, wu medano sniqoyoyo l’funoyo athronoyo mkanşo. I şalyuthfemo du athro mqabıl du tehdidano d’Hizballa kımmathıl tenhito di katfo bhaq di morutho udu statu d’Lebnon”. 

Callathe, Murad tlıble mu kenşo emwothoyo ubi qadmoyuthayde u Mawtbo di Mşaynutho, dmafıt la haye a’tre fusqone emwothoye 1559 u 1701 dkıtne laltah du fosuqo da şawco, bnişo dmisım u sutoro d’Lebnon mu zayno d’Hizballa, udmıkle mqabıl di şalitutho d’Hizballa bu haqlo folhoyo u folitiqoyo. 

Bebzabno, Murad sımle qroyto qrihto la qoyume di morutho d’Lebnon dmaydi calruhaye i mşalutho athronoyto, udıtılbi b’şıkıl ftiho u qriho b’gawıd du parlamento dmitafiti a’tre fusqonani la haye. 

Murad ba melani ste hthımle i maqırhonuthayde ”Lebnon lıgıdhowele dactid hul dkito man dıktocın u zayno mqabıl di şultonutho, uhul dkito hın Lebnonoye dıkmaqıbli dcayşi bu telolo d’zayno dlatyo ruşmoyo. Balhude i morutho kamılto kmaxılso u athrano, ubalhude u zayno ruşmoyoyo dıkmastır a’Lebnonoye”.