İDC sımle qroyto la mşale Turkoye dmitakliyo i dacwa d’Dayroyo Aho Bilecen

U Tukoso Emwothoyo du Sutoro dcala Mşihoye, ksoyım qroyto la mşale Turkoye, baroyo dmaqimi a idicat lo şarire dıkmıthım ebeye u dayroyo Aho Bilecen. A melani du mşalo du tuko Mşihoyo d’İDC Toufic Baaklinine.

 İDC frısle i egarthathe bi dafayde du nawlo u krıhle a thomani d’Turkiya mqabıl du dayroyo di dayro d’Mor Yahkub Sefer Aho Bilecen.

In Defense of Christians (IDC) awkith u Tukoso du Sutoro dcala Mşihoye dkıtyo u qentrunayde b’Woşington d’Amerika, frısle egartho bi dafayde du nawlo u sımle qroyto la mşale Turkoye, baroyo dmaklın i dacwa dıftiho mqabıl du dayroyo di dayro d’Mor Yahkub Sefer Aho Bilecen.

İDC dkıtyo tukoso dıksonıd a qalilotho Mşihoye ban athrawotho du Madınho Mescoyo mahkele bi egarthathe, aydarbo u dayroyo di cito Suryoyto Orthodoksoyto b’Turabdin dkıtyo bu tayman madınho d’Turkiya, thim ma mşale Turkoye bu snodo di marhıbonutho cal dhuwole lahmo u maye lfarsufe dkıtwın kafine qum du tarco di dayro ba 2018.

Amşale Turkoye mdacelın, da farsufani dqayıthlın muklo kıtwolın esore cami PKK u bu funoyo dhuwle u dayroyo m’akadle, dkobe muklo lkull noşo dıkmohe bu tarco di dayrayde dılo fırşono, cal di haymonuthayde i Mşihoyto kıtulbo mene u medano. İDC kımawdıc, du bethdino du dayroyo mşawhır 3 naqlat bıgawe di şatathe cali bsirutho da ithbate dkito bide di şultonutho Turkoyto.

U rişono d’İDC Toufic Baaklini komır; Ucdo’ste mşawhır u bethdinano lu yarho d’Nison dıbqamuthayna u gıdmisım sxiro lu tbocofroso u hathe kımadilo, da mşale Turkoye kımnasın dxuqli dacwa dlatla yuthrono. U dayroyo dbıhle nafşe li xıdme di citayde u xıd Mşihoyo towo, a tarcayde kull naqla ftihene leşan i mcadronutho dğer. Wu qedomano dhawi lu dayroyo-kırmız u rdufyo dkowe cala Mşihoye b’Turkiya. Calathe kısaymina qroyto l’Turkiya baroyo udlo tehito d’şartat dmaklıyo i dacwathe du gayroyo Aho.