İmdabronutho d’Biden gdımdawmo usnodeyda la hayle d’Qasad

‘İ mdabronutho hathto du rişono Amerikoyo Joe Biden, gıdmdawmo u snodayda la Haylawotho d’Suriya Demoqratoyto’. İ mawdconuthathe, di wazirutho di baroyutho d’Amerikayo.

 U malolo di wazirutho mırle; İ mdabronutho d’Biden, gıdmdawmo i methcadronuthayda cama hayle d’QASAD bu ağuno dıkmitahwe mqabıl da ğrobe marhıbone d’Dacış b’Suriya.

Lfuth i maqırhonutho dhuwle u malolo di wazirutho di baroyutho d’Amerika, i mdabronutho hathto d’Woşington latla niye dqutco a esorayda cama hayle bnayqyomo du garbyo d’Suriya, elo gıdmdawmo i methcadronuthayda cama Haylawotho d’Suriya Demoqratoyto bu ağono mşawtıfo dkobın camu koalisyon Emwothoyo bu ağono mqabıl da ğrobe marhıbone d’Dacış.

Bi maqırhonuthathe mawdıc; A hayle d’QASAD bu dawro dhawilın xıd Aryo bu ağonano mqabıl d’Dacış mi naşfe, gıdfayşi hawro bnayqyomo bu haqlo folhoyo l’Amerika. Bu snodaydan kibın dımdawmi u ağono du qşoco d’Dacış u dnutri ban alfayo d’marhıbone wa yaqrothathe dkıtne msike. Ma 2014 kısundina a haylani bu lojistik folhoyo wu snodano’ste gıdmdawım.

Mawdıcste; Walaw i şultonutho d’meqım fsıqwola dgurşo sahmo ma folhaydan mu garbyo d’Suriya-u d’hathe huwla bahro yaroqo l’Turkiya dhuçmo  cala hayle d’QASAD bu yarho d’Teşrin u qamoyo da 2019, a Mharbonani naqla hreto mdawamlın i methcadronuthathe cam Amerika bu ağono mqabıl d’Dacış bu garbyo d’Suriya u hedor u nahro d’Froth.

Bi maqırhonuthathe i wazirutho mırla; Amerika gıdfayşo bu kordinasyon dcama hayle bnayqyomo du garbay madınho d’Suriya; beynothaye a hayle d’QASAD wa şutose mdinoye u noşo du qlimo. Ahna gıdmawmina bu snodaydan leşan a sniqwotho noşoye udı qulxina şalyutho u mşaynutho leşan u dactith da came d’Suriya. İ wazirutho di baroyutho d’Amerika bi maqırhonuthathe mawdacla’ste u snodayda la hayle di peşmerge wu gayso Cıraqoyo bu ağonathe mqabıl d’Dacış.