Msik 2 thimoye cala furqoce qtolnafşoye dısmiwo b’Boğdod

Msik kmo farsufe dıkmıthomi, dıktucni i mşalutho da tre furqoce qtolnafşoye dsimiwo meqım şabtho bi arişkoyto du Iraq Boğdod.

 Bebzabno mawdıc, da hayle di mşaynutho du Iraq kımdawmi a cuqobathe cal d’Dacış u qtilın 10 marhıbone b’Kerxeslox u msik tlotho hrene b’Diyala. Me gabo hreno, a hayle Iraqoye maqşelın u duyoqo di mşaynutho da thumathe dcam Suriya.

Xıd funoyo lu amro dhuwole u rişwazire du Iraq Mustafa Alkadhimi dmıftıh baroyo buqore cala celotho du fuqroco qtolnafşoyo dsımwo yawme d’Hamşo dşaficina bi arişkoyto d’Boğdod, hadomo bi sictho du sutoro du parlamento athmıl mawdacle dımsik kmo farsufe dkıtlın mşalutho bi sbutho du hçomano dhawiwo bi şawtho d’Altayaran, u dqtılwo ebe 32 farsufe u mçarahwo 110 hrene.

Megabo hreno, u tahlufo qamoyo du rişono du parlamento Hasan Alkacbi, sımle qroyto dmisarhıb ba buqore dcalu hçomo marıhbono d’Boğdod, udmimıd hşowo ma hayobe.Alkacbi bi maqırhonuthayde, makadle ste di mşaynutho d’Boğdod masırtoyo cami mşaynutho da hiğmınwotho hrene ucami mşaynutho qlimoyto u baroyto, mawxa tlıble dmitaqwın a’fulhone da n’istixbarat, udmitarwıhi a’cuqobe mqabıl Dacış.

Bebzabno a tayosyotho du qrobo du Iraq bu snodo da hayle du koalisyon Emwothoyo sımlın cuqobe oyaroye cala marhıbone d’Dacış b’Kerxeslox u qtilın 10 menaye. Bı cuqobo hreno dsımlın a hayle Iraqoye bu qlimo d’Diyala, msıklın 3 marhıbone u mahrıw’ste 15 foqucotho dmahti calu darbo du qlimo d’Anbar.

Cali aykanoyutho harayto du Iraq, a hayle di mşaynutho mbayanlın ucdo qlimo d’450 kilometre mu thumo beyn du athro udı Suriya u markawlın burge du duyoqo u mahıt teel qawyo, leşan dlo mitahwe aftho lu mazlo u mathyo da marhıbone beyn da 2 athrawotho. Camatheste kito plan, dmiamın falqo hreno mu thumano dkıtyo 610 kilometre yarixo u maqwe bu şıkılano u duyoqo di mşaynutho da thumani.