İmdabronutho yothoyto sımla qroyto la şutose emwothoye dsaymi u mede dıknofıl aclaye bnişo dmişarır u şlomo b’Suriya

Bu yawmo tibeloyo du şlomo, i mdabronutho yothoyto du garbiyo udu madınho d’Suriya sımla qroyto la gabe u tarafe mşahılfe du athro, dfılhi camıhdode laşan dmitarkıwo i şalyutho wu şlomo b’gawıd d’Suriya.

Ubebzabno i mdabronutho sımla qroyto la şutose emwothoye dsaymi u mede dıknofıl aclaye, bnişo dmişarır u şlomo b’Suriya.

Bu buyono dıfrısla athmıl bi cohnutho du yawmo tibeloyo du şlomo, i mdabronutho yothoyto du garbiyo udu madınho d’Suriya, sımla qroyto la tarafe mşahılfe du athro dfılhi laşan u şlomo wi şalyutho dmitarkıwi b’Suriya, u mawdacla du gabo dlıkfolıh laşan du şlomo, cal dıkmahıt i aginda folitiqoyto druhe meqım mi mşaynutho umi şalyutho du athro.

U buyono mawdacle ste da siyasat kaboşe, a’dyoşe, u snodo di marıhbonutho udi tuhmonoyutho qento rabone calu şlomo, u mawxa ste i mdabronutho yothoyto mawdacla d’athi ucdo u zabno dhowelın a’tarafe kulle methcadronutho camıhdode bnişo dmişarır u şlomo b’Suriya. Umi xasrayda, i mdabronutho yothoyto makadla dkıtyo b’fusqono kamilo dsaymo u mede dıknofıl acla, laşan u şlomo dmitarku b’Suriya.

Camgabıdathe, u buyono mawdacle du diyalog wi awyutho bayn da gabe athronoye d’Suriya kımmathli u darbo du şroyo du kriz folitiqoyo d’Suriya, u mawxa ste i mdabronutho yothoyto sımla qroyto la şutose emwothoye dsaymi u mede dıknofıl aclaye bi sbuthathe.

Mxasra hreto, i mtakasto da zedqe noşoye du qlimo di Gozarto d’Suriya bu buyono dıfrısla bu yawmo tibeloyo du şlomo, tlıbla m’Emwotho Mhaydotho dmaydo calruha i mşalutho du qefoyo du şroyo du kriz d’Suriya, dmafito u fusqono da 2254 la haye, ud’markıwo i mşaynutho wu şlomo ba n’athrawotho du madınho mescoyo kulle.

M’gabo hreno, i mdabronutho yothoyto bu zabno dkımnasyo dmişarır u şlomo b’Suriya, u rişono du rejim dı Turkiya kımnase dmarwıh u qrobo wu şğuşyo b’gawıd du athrano. Lfuth u ajans Amerikoyo da tebe d’Blomberg, Turkiya mşadarla konvoye d’folhe u zayne hathe li fnitho d’İdlıb, xıd funoyo la hçome oyaroye qaşye dıkmisomi ma haylawotho Rusoye udu rejim calu garbay macırbo d’Suriya. Blomberg mawdacle di şultonutho d’Erdoğan mşadarla olfawo d’folhe hathe, laşan dmaklın a’haylawotho di naşfe du rejim, udmahti ido calu darbo dkıtyo azolo lafa thume dı Turkiya, bnişo dmınci dşofıc galwoye Suriye la n’arcotho Turkoye, dilonoyith di şultonutho d’Erdoğan layba fayış d’obo funoyo lu camo dkıtyo cajizo mu kriz da galwoye.

Callathe, u ajans d’Blomberg mawdacle d’Erdoğan gıdmaqşe i mwatyutho folhoyto b’İdlıb, meqım mi lqoyto dgıdhowele 29 bu yarhano camu rişqutno d’Rusya Fladimer Putin ucamu rişqutno du İran İbrahim Rayisi.