In Defense of Christians: Amerika zodeq maqşıyo u hbosayda cal Suriya dımqadmo a hayobe lqum di kinutho du hçomo marhıbono dsim cali cito d’Mor Eliyo

WASHINGHTON – U tukoso d’In Defense of Christians-İDC, hfitoyo bu snodo ubu groşo du zuhoro cali aykanoyutho da Mşihoye uda qalilotho tawdithoye hrene bu Madınho Mescoyo ubi maqırhonutho dfrısle u tukosano dkıtyo bi rişonutho d’Richard Ğazal dkıtyo mu camaydan, b’qaşyutho krıhle u hçomo marhıbono dsim cali cito d’Mor Elias dkıtyo bi şawtho di Dwelca b’Darımsuq.

Bi maqırhonuthatho d’İDC mahkele calu hçomo dsımwo 22 bu yarhano cali cito Malkoyto Orthodoksoyto ucalu mınyono celoyo da Sohde uda dıbhe du furqocano u tlıble mi şultonutho d’Amerika dmaqşıyo u hbosayda cali şultonutho d’Suriya leşan dfayto li harake, dımqadmo a hayobe lqum di kinutho u dmaydo tedbire casye di mşaynutho leşan u sutoro du kenşo Mşihoyo mqabıl da hçome dkibın dhowın bu dactith.

İDC mırle; U qtolcamo dsim bi cito d’Mor Elias, hawi u hçomo qaşyo dımtayıb mu zabno du nfolo du rejim catiqo d’al Asad bu yarho d’Konun u qamoyo da 2024 uholucdo. U hçomano, xlıqle zuctho hathto cala Mşihoye şerşoye d’Suriya. İ şultonutho balki krıhla u hçomano, elo a melayda klozım dmitabqi bu camlo u dımhaşwo a hayobe. En u tehşiwano dlo misım, gıdmişaçci a hayobe lğer gunhe marhıbone dkıtne bu dumyano.

Lfuth Richard Ghazal, Amerika klozım dhuwyo qrıhto camu rişono hatho d’Suriya al Şarıc, dkull cedolo d’esore diplomatiqoye cam Suriya, masre’ne b’mıqa i şultonutho kiba u dkubco dobo u garanti di mşaynutho da qalilotho tawdithoye u etnikoye du athro u dımaydo mşalutho u dımtabqo a prensibe wa qonune di kinutho du athro mqabıl da hçome marhıbone dıkmisomi cala qalilotho tawdithoye.