03/07/2025

İran griş ruşmoyith mi daira d’İAEA

U İran maklele ucdo ruşmoyith i methcadronuthayde dcami Daira Emwothoyto du Energi udu Atom. U fusqonano mid, belhude kmo yawme bıthır mi şalyuthzayno dhawyo beyn du İran u İsroyel u acma Amerika. Bu zabno du waziro di baroyutho du İran kımawdıc, da hçome dsimi huwlın husrono rabo la macımle du nukleer, Pentagon’ste m’akadla da mhoyani madcarlın i tahrazto du nukleer du İran tarte eşne laxalaf.

03/07/2025

TEHRAN — Bıthır mıd İsroyel u Amerika sımwolın cuqobe d’12 yawme cala macımle nukleer du İran, huwolın husrono rabo li tahraztayde du nukleer. Bu qrobano’ste, qtılwo hol 900 bnaynoşo ba mhoyani ubı İsroyel’ste qtılwo 28 farsufe. Bıthır mu qrobano, heş latwa i aykanoyutho da macımlani idicto ubi maqırhonutho dhuwole u waziro di baroyutho du İran, m’akadwole da macımlani hzelın husrono rabo.  

U malolo d’Pentagon Sean Parnell huwle athmıl maqırhonutho u mawdacle, da mhoyani dhawın bu İran, madcarlın i tahrazto nukleer du athro 2 eşne laxalf. Kmo yawme bıthır mi şalyuthzayno dmarkıwo beyn İsroyel u İran, fsıqla Tehran ucdo ruşmoyith dmıgroşo mi dairathe. U İran mafıtle athmıl la haye u fusqonayde dmakle i methcadronuthayde dcami Daira Emwothoyto du Energi udu Atom-İAEA dkıtyo u qentrunayda b’Den Haag.  

İ dairathe d’Emwotho Mhaydotho, kısaymo u duyoqo du snoco da zayne nukleer b’britho. U groşano du İran, hawi’ste xıd hfuxyo mqabıl di daira d’IAEA cal dfayişo b’şetqo mqabıl da mhoyani b’Fordow, İsfahan u Natanz u naqla hreto mdace, du nukleer du İran l’yuthrone kenşoye’yo. Elo camathe’ste, rişone d’athrawotho frişe dbritho u acmaye Emwotho Mhaydotho kısaymi qroyto lu İran dfoyış b’İAEA u d’docır li tablitho da bazare leşan dmisafın a qetrani.