Msik tarte folitiqorotho hrene du gabo di HDP

İ rişonitho catiqto du gabo demoqratoyo da uhudone Sebahat Tuncel wi qoyumto catıqto du gabo di HDP Aysel Tugluk msiki bıthır me zabno dkıtweyne tahte du duyoqo da pwelıs.

A tarte folitiqorotho kmıthomi ba hfitwotho du yawmo şatonoyo du mrodo d’Kobane dhawiwo bayn 6 u tmanyo bu yaho d’Teşrin u qadmoyo meqım şeth ışne.

 Bu zabno haroyo i şıltonutho du athro d’Turkiya mahıtla ido cal ğalabe ma hadome u mşale u qoyume du gabo di HDP u du gabo BDP bi sbutho da mamle dhawınwo meqım şeth ışne bu zabno du qrobo dkıtwo mqabıl da marıhbone dı Dacış b’Kobane d’Suriya.

Bu fusqono dmıdle u bethdino du ferco hmişoyo d’Ankara bhaq da tarte folitiqorotho Sebahat Tuncel u Aysel Tugluk msiki u gıdfayşi bu hbuşyo hul dmitahwe u fusqono haroyo bhaq dıthe.

İ celtho dmahwele u bethdino mawdacle inaqa dı fayşi larwal kibın mathri calu maşıqlo du bethdino.

Bi sbuthathe da hfitwotho d’Kobane dıkmitawmarlın msıko ba casrowat d’folitiqore Kurdoye awste dkıtne du gabo di HDP.