İsroyel hadırto’yo dmarwıho u qrobayda b’Suriya ubı Lebnon

I Mşatasto da zedqe noşoye d’Suriya, mawdacla dşmic adyawma safrayto, qolo d’furqoce rabe Darımsuq bi netiçe da hçome oyaroye dsımla İsroyel cal dukotho frişe. Mawdıc da hçomani simi cali fnitho dıknıflo beyn d’2 qastra hedor di arişkoyto u mdlın nişo nuqazyotho u cambare du zayno da grube dıkmısnodi mu İran. Bıthır mıd simi a hçomani şmic qolo d’furqoce qawye.

I Mşatasto, makadla dqtil menyono d’farsufe bu hçomano d’İsroyel, u maglela di fnitho dhçim acla kiba qentrune u nuqazyotho folhoye u cambare du zayno du gabo d’Hizballa d’Lebnon. Me gabo hreno, u hadomo bi şultonutho di Sictho du qrobo d’İsroyel Benny Gants dkıtwe bebzabno u waziro catiqo du sutoro mawdacle du athrayde hadiroyo dmitarwıh u qrobo b’Suriya ub’Lebnon.

Gants bi socurutho dsımle la turone du Golan mathkarle du rwoho du qrobo kibe dhowe ulsoyo leşan da comure du garbiyo d’İsroyel dqudri ducri la botathe. Gants mırle’ste; Lebnon u Suriya xıd 2 athrawotho ktucni i mşalutho da hçome dıkmisomi ma arcothathe cal İsroyel. Ahna gıdmdawmina dmohina kull fnitho dıkmıhçım mena cal İsroyel.

Bebzabno, Gnats mawdacle dkito ba casro alfayo dıbnaynoşo dmahzamlın ma botathe bu taymno d’Lebnon bi netiçe du qedomo d’Hizballa. Gants dımzaharle Hasan Nasralla cala rmoşe dıksoyım leşan du yuthrono du İran, mırle; Klozım Nasralla dlo mşahlıf u taymno d’Lebnon lu garbiyo d’Ğazza, u klozım dlo tore Beyrut dhuwyo dıbho leşan u İran.

Mxasra hreto, u rişono d’Amerika makadle di şultonuthayde gıdmdawmo dfulho cam Lebnon ucama şorikayda bu Madınho Mescoyo, bnişo dmınfıq moro lu şlomo u dlo rowıh u wahdo du qrobo. Biden bi egartho dımşadarle lu rişono di şultonutho d’Lebnon Nejib Miqati, mawdacle dkıtle sabro dfolıh cam Lebnon bi şato dothe leşan dmibayın dactid mşayno u towo la came du qlimo kulle.