Lfuth Amerika, a hayle d’Wagner kıtte tahrazto dımşadri soruhe lu İran

Bi maqırhonutho dhuwle athmıl John Kirby bu knuşyo dsim la gelyunore b’Woşington maglele, dmatilın mawdconutho da hayle d’Wagner-dkıtne paramiliter-awkith hayle mtakse camgabe du gayso ruşmoyo d’athro, dıkmısnodi momunoyith me Rusya, kımtaybi ruhaye dımşadri sisteme du sutoro da thume oyaroye.

Lfuth Kirby, u sistemano’ste kito dmitahwe ya la hayle Hizballah b’Lebnon, yaste la hayle du Qawmo du İran leşan dhowe methcadronutho beyn hıdode bu haqlo di mşaynutho. Bu mamlayde Kirby mırle; İ mawdconuthathe dmatilan, kımadilo d’Wagner-bu amro baroyo di şultonutho d’Rusya kımtayıb ruhe dımşadır u sistemano du sutoro da thume oyaroye-ya l’Hizballah u yaste lu İran.

Bu şuroyo du yarhano’ste mşalo Amerikoyo mawdacwole li sfaryawmo d’The Wall Street Journal, d’Wagner kımtayıb plan dımşadır u sistem d’Pantsir-S1 la hayle d’Hizballah. Kirby’ste kımawdıc, d’Amerika kmıstacmılo a tedbire di marhıbonutho mqabıl d’Rusoye u şutose dkıtte sawco bu şedoro dhawxa soruhe.

Bebzabno Amerika kımawdıc’ste, dkıtte hzayto du İran mşadarle soruhe ballistik l’Rusya leşan dmıstacmılolın bu qrobayde b’Ukraina. Bu yarho d’İlül sımwole u waziro du sutoro d’Rusya socurutho lu İran-u hathe mfaşqo me Amerika xıd dawse li methcadronutho folhoyto dhawyo beyn Mosko u Tehran-dkito hani zabno tedbire Emwothoye casye aclaye b’haqle frişe.