16/05/2020

İsroyel kımdawmo dhıjmo cala hayle İranoye b’Suriya

İsroyel kımdawmo dmaydo a haylawotho İranoye nişo la hjome dıksaymolın cal Suriya. Bi şişaltho da hjome İsarloye cal Suriya, adyawma sim hjomo hatho cala nuqazyotho da grube mzayne İranoye dkıtne hedor di mditho d’Hlob bu garbiyo d’Suriya.

Hın ma hfite mdinoye d’Suriya, bi maqırhonutho dhulın adyawma la şutose du tboco froso, makadlın dhawi adyawma ba şoce qadmoye d’safrayto furqoco rabo bi mditho d’Hlob, u mawdaclın du qolo du furqocano dışmic athi luhwoyo bi netije dı hjomo hatho dsımla İsroyel cal nuqazyotho İranoye bi mditho.

Be bzabno, hın ma şutose du tboco froso bi mawdconutho dmıdlın ma farsufe dkıtne hfite b’gawıd d’Suriya, mathkarlın du furqoco dhawi hjomo oyaroyo dsımla İsroyelyo cal nuqazyotho da grube mzayne İranoye dkıtne bi fnitho d’Alramuse hedor di mditho d’Hlob.

Camgabıdathe, a şutose du tboco froso di şultonutho d’Suriya, belhude mawdaclın dışmic qolo d’furqoco rabo bi mditho d’Hlob adyawma ba şoce qamoye d’safrayto. Elo şutose hrene du tboco froso mawdaclın di bethsawbo folhoyto da topat dkıtyo bi fnitho d’Alramuse mido nişo la hjome oyaroye d’İsroyel.

Lo i şultonutho d’Suriya ulo ste a şutose mşahılfe du tboco froso maglelın calu şıkıl ucali kmoyutho du husrono dhawi bu hjomano.

Meqım mathe bıkmo yawme, i mğaltho Amerikoyto d’Fox News frıswola surotho dıgrişiwo ma sahre sınci dıkmahwın du İran mhalaqle dawse bu bnoyo di nuqazto d’Al İmam Cali bi fnitho dı Der Ezzor qariwo ma thume d’Suriya camu Iraq.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…