İsroyel mıhela ba dukotho da haylawotho du İran b’Suriya

Atayısyotho folhoye İsarloye hjımlın adyawma cala grube mzayne du gabo Lebnonoyo d’Hizballa calu darbo dıknofıl bayn da mdinotho d’Hımıs u Tadmor b’Suriya.

Meqım mu hjomano bıkmo şoce, İsroyel sımwolaste hjomo hreno cal dukotho du gabo d’Hizballa bi fnitho dı Darca bu tayemno d’Suriya.

I mşatasto d’Suriya da zedqe noşoye, mawdacla dışmic adyawma qolo qawyo d’furqoce bi mditho d’Hımıs u hedora, bi netije du hjomo hatho dsımla İsroyel ba soruhe cal Suriya.

Bu hjomano a’soruhe mhın b’cambar da soruhe uda zayne du gabo Lebnonoyo d’Hizballa dkıtyo b’gawıd di maşritho d’Alhasan Bın Alhaytham udıknofıl calu darbo bayn di mditho d’Hımıs u Tadmor.

Bu hjomano dsim, u cambar da zayne shif u hawi furqoce ğalabe rabe bi duktho dımhın a’soruhe dfayır falqe menaye l’gawıd di mditho d’Hımıs. U meqım  mıdmifarqıci a’soruhano, a’haylawotho oyaroye du rejim d’Suriya mnasewolın dnıfqi mqabıl dıththe udmadrınne.

Lfuth i mşatasto d’Suriya da zedqe noşoye, i maşritho d’Alhasan Bın Alhaytham kmitıstacımlo la duroşe da bethsawboye, elo u gabo d’Hizballa hani zabno dıkmo ışne mbayanle i maşrithathe xıd qentrun ele.

Adyawmaste meqım mıdmisım u hjomano ba şoce d’fothıdsafro, a’tayısyotho İsarloye du Holikopter, mhelın soruhe bhın nuqazyotho folhoye da haylawotho du rejim udu İran bi mditho d’Alqunaytıra ubi qritho dı Tel Ahmar Alğarbi.

Camgabıdathe, i mşatasto d’Suriya da zedqe noşoye mawdacla d’İsroyel mhela hamşo soruhe bhın dukotho du rejim udu İran bu macırbo dı Darca, ubi fnitho dı Tel Ahmar Alğarbi bi mditho d’Alqunaytıra, elo lohiw mawdconutho calu husrono dhawi bi netiçe du hçomano.