27/04/2022

İsroyel simla hçome hathe cal Darimsuq

İsroyel sımla hçome oyaroye hathe cal nuqazyotho folhoye İranoye hedor di erişkoyto d’Suriya Darımsuq. Ba hçomani qtil u mçarıh hedor d’20 farsufe ma folhe du rejim uma grube mzayne noqufe du İran.

27/04/2022

DARIMSUQ, Suriya – İ mşatasto da zedqe noşoye d’Suriya, mawdacla d’İsroyel sımla adyawma ba şoce d’fothıdsafro hçome oyaroye hathe cal  nuqazyotho folhoye hedor di mditho dı Darımsuq.

Ba soruhe İsarloye dımhalqi shif u mfarqıc menyono d’nuqazyotho folhoye du İran, baynothaye nuqazto dıknıflo hedor di qastra d’Sa(h)naya b’Darımsuq, nuqazto hreto bu turo d’Alsomariya qariwo mu grub folhoyo da 100, u turo dkıtyo qariwo mu bethtawso emwothoyo dı Darımsuq, i nuqazto dıknıflo bayn Dummar u Qudsiyya wi fnitho di Kıswe. Ba fenyothani w’alwa ste bu ışmo idicene dkıtne du rejim d’Suriya, elo kito b’gawaye grube mşahılfe du İran udu gabo d’Hizballa.

Lfuth i mşatasto da zedqe noşoye d’Suriya, ba hçome İsarloye dsimi mfarqıc cambare d’zayne ud’buğre, u shifıste nuqazyotho dkıtne b’gawıd d’maşıryotho folhoye.

Camgabıd da husrone momunoye rabe, ba hçomani ste dsimi qtil 9 farsufe baynothaye hamşo folhe du rejim u arbıco ma grube du İran, u mçarıh ste 8 hrene.

Meqım mathe 14 bu yarhano, İsroyel sımwola hçomo calu tayman macırbo dı Darımsuq cal hdo fnitho dkıtwo eba nuqazto folhoyto da grube İranoye, udu gayso Fleştoyo d’Alta(h)rir.

U hçomano dsımla adyawma İsroyel, u hçomo da casro yo dıksaymole cala n’arcotho d’Suriya mu şuroyo di şatathe uhul ucdo.