İsroyel u Hamas hadire l’şalyuthzayno, elo b’şartat

U rişono d’Amerika Trump meqım kmo yawme mawdacwole bıthır ma ytawyotho dhawın, maqbela İsroyel a şartat dlozamwo leşan u terkiwo d’şalyuthzayno l’zabno d’60 yawme camu zawco marhıbono d’Hamas. Ucdo’ste u waziro di baroyutho d’İsroyel Gideon Saar m’akadle, dkıtne jıddi bi sbutho dmımte l’awyutho cal qyomo dmitarfın a yasire kulle u dmitarkwo şalyuthzayno.

U waziro İsarloyo mırle’ste; Elo kobacno dmaqrahno, d’Hamas’yo dmabdele u qrobano u huwe’yo i celtho dımdawamle hawxa zabno yarixo. Calathe klozım u hboso cal Hamas dmitaqşe wu kenşo Emwothoyo dsonıd u inisyativano d’Amerika.

Bğer maqırhonwotho dsimi me İsroyel’ste kmitamır, hol dlo mitatım Hamas laybe dmitakle u qrobano.

Athmıl’ste malolo du zawco d’Hamas mawdacle, dkıtne hadire l’şalyuthzayno, elo naqla hreto tlıble di şalyuthzaynathe i mıcnayda, dmitakle u qrobano kamiloyith’yo U mamlano d’Hamas, funoyo’we lu mamlo du rişono d’Amerika dmawdacle d’İsroyel hadırto’yo l’şalyuthzayno d’60 yawme.

A mamlani di idica du terkiwo di şalyuthzayno kmisomi, bu zabno da cuqobe da hayle İsarloye’ste kımdawmi calu Xtuto d’Ğaza. Lfuth a mşale Fleştoye, ba hçome haroye dsımla athmıl İsroyel, qtil 94 Fleştoye; 80 menaye qtili ba cuqobe oyaroye wa hrene’ste qtili ba dukotho dkıtne qariwo lu feroqo di mcadronutho noşoyto. Ha ma hçomani d’İsroyel dqtılwo ebe beyn 24-26 farsufe, u hçomo dsımwo cal kafeteri b’Ğaza’yo.