Kımdawmo i maşritho di claymutho d’Syriac Youth bi Swisra

SWISRA — 3 bu yarhano bıdelın a clayme u claymotho du camaydan dlaymi me athrawotho frişe d’Urifi li maşritho dımtaybole u Şutoso di Claymutho d’ESU Youth b’Swisra. U yawmo trayono, friş u droşo calu şutoso di claymutho-u nişayde mınyo u men fulhone kımaşe ubu yawmo da tlotho’ste, mahke bşıkıl rwiho calu makthabzabno catiro du camaydan. Lfuth i mawdconuthathe di sictho mtaybonitho, bi tahrasto catırto dımhaydro kmıştawtıfo i claymutho kula li maşrithathe b’fsihutho rabtho.

Holucdo ba turgome ubu workshop dsim calu makthabzabno du camaydan, qadiro i claymutho dyulfo u dacbarayda u dhowela sırto rwıhto u latimto cali yortuthayda. Ba şwole-Manna? mayko’na? u mınna?, hiw mkono lu kroxo da funoye bu kthowo dışme; u Makthabzabno da Suryoye. U mede d’grışe u zuhoro’ste, i claymutho l’hiqayto’yo lu yulfono dcali hiyoyuthayda u hawlia qrayto li hdoyutho.

ESU Youth kımawdıc, Hawi tuyole frişe; xıd mathlo li dayro dkıtyo calu turo wu lqoyo dhawi cami rişthdayrayto, hawi ğakabe mawthrono. I claymutho msalela i Abun d’başmayo bu leczo macırboyo u madenhoyo u tlibla sabro u şuşoto lu camaydan b’Bethnahrin. U tuyolo hreno hawi bu qruxyo dsim b’sfito u halxo bu turo wa clayme u claymotho hawilın mkono ba ğrube dsimi, dhowelın camhdode droşo u sim maqıblonwotho li dafo d’Syriac Youth.

Bu huthomo u Şutoso di Claymutho d’ESU Youth kımawdıc, da mıştawtfone mawdaclın’ste dkıtne fsihoye d’hadiri i maşritho qaytoyto u dkibci dhowen mcadrone bu Şutoso di Claymutho. Ba yawmotho dıbqamuthayna gıdowe herge calu dawro di claymutho, cala qtolcame dsimi calu camaydan u dgımıkle cali tahrasto şatonoyto d’Syriac Youth. I maşritho kmisomo b’zabno dkito sniqitho rabtho l’tukoso hatho lfuth da şartat dkito u mawxa kmıhzoyo i maşrithathe xıd şuşoto hreno l’methtaksonutho, li ithutho rwıhto bi sosyal media, xloqo d’hawrutho cali arcutho d’tahrasto di claymutho, lu yulfono di hdoyutho umthoyto u hfitwotho lu nuhoro di claymutho du camaydan cali hiyoyuthayde.