Kımdawmo i qale beyn da grube folhoye du rejim d’Suriya

U qrobo talyo dcali morutho wi qale dkıtyo laltah du telolo, kımdawmo bi hiğmonutho dı Darca beyn da tre grube folhoye rbicoyo u hmişoyo du rejim d’Suriya.

 Lfuth i Mşatasto da zeqde noşoye d’Suriya, Rusya dımşatasla u grub folhoyo hmişoyo d’Suriya, tlıbla mu grub folhoyo rbicoyo dkımrayşanle Maher Alasad dmıgroşi ma nuqazyotho kulle dkıtlın ba fenyotho d’Suriya.

 İ hiğmonutho dı Darca dıknıflo bu taymno d’Suriya, hawyo wahdo du qrobo talyo bayn du grub folhoyo hmişoyo du rejim d’Suriya dımşatasla Rusya wu grub folhoyo rbicoyo dkımrayşanle Maher Alasad dkıtyo u ahuno du rişathro d’Suriya Başar Alasad. Bu taro di qalathe dkuyo laltah du tlolo, kul gabo ma tre grubani kımnase dforıs i moruthayde bi hiğmonutho d’Darca.

İ mşatasto d’Suriya da zedqe noşoye, bi maqırhonutho dhula lu tboco froso mawdacla du grub rbicoyo kımnase ucdo dgorış lafele a’gabre wi claymutho dilonoyith dmıştawtafwolın meqım l’qrobe, mqabıl d’ağre celoye u yuthrone hrene. Uba zabne haroyani, u grub rbicoyo qadır dgorış lafele ba casrowat d’farsufe dımbarbızile b’nuqazyotho du duyoqo bu macırbo di hiğmonutho dı Darca bıthır mıdhew elaye duroşe folhoye.

U me gabo hreno, u grub hmişoyo dıkımrayşanle Suhel Alhasan udıkmısnıd m’Rusya kıtle morutho rwihto b’Darca u haylo dıkmişakıl ma mharbone catiqe saqıbloye dsımwo şbuqyo baynothaye ubayn du rejim d’Suriya. İ Mşatasto da zedqe noşoye d’Suriya, ba yawme dşaficina mawdacwola d’Rusya hula amro dmitaqimi a’nuqazyotho du duyoqo kulle dıkmidabri mu grub rbicoyo d’Maher Alasad dilonoyith dkıtne b’Darca.

Lfuth i mşatasto d’Suriya, Maher Alasad hul ucdo krofıd dgorış a’folhayde ma nuqazyotho du duyoqo, elo Rusya kıbco dmıtyo lu nişano, u mawxa kımdawmo dmasırho mharbone hathe mqabıl d’ağre celoye.U grub rbicoyo d’Maher Alasad klozım balhude dhowele nuqazyotho bi mditho dı Darımsuq u hedora, elo kıtle nuqazyotho ba fenyotho kulle dkıtne bi morutho du rejim d’Suriya.