Kımdawmo imwatyutho beyn Donald Trump u Nansi Polesy

U rişono d’Amerika Donald Trump, sımle mamlo li umtho mi kongre du athro.

 U mede dgrışle u zuhoro du tbocofroso Emwothoyo, latwe u mamlo dsımle Trump, elo i m’watyutho ftıhto dhawyo beyn Trump wi rişonitho du Mawtbo tahtoyo Nansi Pelosy’wa.

Bu zabno dı salıq u rişono Amerikoyo Donald Trump lu masırho leşan dsoyım u mamlayde li umtho, maslamle kopia du mamlayde lu mcadronayde Mike Pence uli rişonitho du Mawtbo tahtoyo Nansi Pelosy dkıtyo mu gabo Demoqratoye u saqıbloyto l’Trump. Pelosy mnawela ida leşan duryo şlomo l’Trump, elo Trump lo midole u sımle u mamlayde la hadire.

Bıthır mıd hthımle Trump u mamlayde dkıtwe 80 qatinotho, Pelosy’ste qum caynothe dbritho uda sayoryotho du tbocofroso Emwothoyo, qtıcla a warqe di kopia du mamlo d’Trump. A Qutnuthoye’ste ba dafathe du twitter, mahwelın hfuxyo lu qedomano d’Pelosy.

Elo Pelosy’ste mfanela bi dafayda; A Demoqratoye kull naqla gıdmqadmi idothaye, leşan dmisım u şuğlo u gıdmqafena’ste arcutho mşawtafto leşan dmisomi a fulhone. Mawdıc’ste d’Trump u Pelosy, heş mu yarho d’Teşrin u qamoyo dı şafıcina uholucdo, lo mıjğelın camhıdode.

Bu mamlano dsımle Trump li umtho lo mbahasle mede calu bethdino dıkmisım ele, u mathkarle sebwotho frişe xıd mathlo; a guboye di rişonutho, u plan du terwiho di siğorta du hulmono, u qetro du momuno, a galwoye lo qonunoye dıkcubri l’Amerika, u qetro dcamu İran uğer sebwotho. Bu huthomo’ste mırle; Kıfulhina, leşan dmaklena a qrobe d’Amerika bu Madınho Mescoyo.