Kıthobuno b’6 leşone cali Corona b’Södertelje

Bıthır ma hfuxye uma sturye dsımle u camaydan li karxutho d’Södertelje du Swed, fris kıthobuno broşür b’6 leşone mşahlıfe; beynothaye u leşono Suryoyo.

 Bu kıthobunano, kmitahke calu virus d’Corona wa tedbire dıklozım dmimodi mqabıl dide.

U virus d’Corona dımşarewole dmibarbız bıbritho bi harayto di şato dı şafıcina, tafiwo lu athro du Swedste. U virusano dhawi celtho lu mawto dıba mo alfayo dıbnaynoşo, mkalafleste a haye d’zıttır me 100 farsufe man abne du camaydan.

İ karxutho d’Södertelje du Swed dmıdwola tedbire mqabıl du kewano, frıswola bu şuroyo di şatathe egrotho, affişe u broşüre ba leşone da came mşahlıfe dıkhoye bi karxutho, elo lo bu leşono Suryoyo. İdicoyo, dıhdo ma mdinotho rişoye dıkhoye mınyono celoyo man abne du camaydan Söderteljeyo.

U qedomano di karxutho, xlıqwola bu şıkılano lo tıhnihutho beyn dhın ma folitiqore, farsufe hfite u şutose frişe du camaydan u sımwolın i mdabronutho di karxutho sturyo qaşyo u ftiho frıswo bu tbocofroso qlimoyo sturye mqabıl di karxutho. Bebzabno u qedomano di karxutho mfaşıq xıd tenkiro di ithutho udi hiyoyutho du camaydan bi mdito.

Bi netije kımahwe du hboso uda sturyani da şutose udan abne du camaydan huwlın fire. Cal adyawma mfarıq la bote da came d’Södertelje kula broşür hatho dıfris b’6 leşone frişe Swedoyo, Eglişoyo, Finlandoyo, Poloni, Suryoyo kthobonoyo u Caraboyo.

U mede dıkgorış u zuhoro, di mawdconuthathe dıfriso cala tedbire dıklozım u camo dmoyıd mqabıl du virusano d’Corona, dıfris bu Suryoyo latinoyoyoste. Hathe kımadilo cali ulsoyutho dkito, du camaydan qulnaqla dhowe hadiro dtolıb a zedqaydeyo.