Kito hol 63 yuqdone frişe ba cobe d’Turkiya dhawın celtho lu mawto d’mınyono dımdinoye

Ba zabnani kınofıq yuqdone qaşye ba cobe d’athrawotho mşahlıfe dı britho ume celothe frişe. Ucdoste kmitawdıc dkito hol 63 yuqdone frişe ba cobe d’Turkiya dhawın celtho lumawto dımınyono dımdinoye.

Elo calu şıkıl du qedomo di şultonutho d’Ankara lu şroyo du qetrano da yuqdone’ste mahwe hfuxye u mtayıb tagliyotho mqabıl dida.

Lfuth a tebe dfrisi b’dafe frişe du nawlo, hani kmo yawme b’Turkiya’ste kımdawmi a yuqdone da cobe b’mdinotho frişe du athro. Ba tebani mawdıc’ste, ba yuqdone dhawın b’21 qlime frişe du athro, nafıq 63 yuqdone u qtil 4 mdinoye u mınyono celoyo d’haywotho.

İ sagiyoyutho da yuqdonani’ste hawın ba qlime du taymno udu tayman macırbo du athro. 43 ma yuqdonani kito ucdo kontroll aclaye elo a hrene heş kımdawmi wa falohe di tıffayo heş kımnasın dmatfın i nuro. 183 farsufe m’athri ma yuqdonani dhawın ba mdinotho d’Antalya, Alanya. A hotele d’Muğla maxlın cal di nuro mqarawola li duktho.

Elo mcal fothe di bsirutho da falohe di tıffayo, da tayosyotho, da helikoptere uda fulhone dıkmisomi bi sbuthathe da yuqdone, mahwele u camo hfuxyo u mtayable tagliyotho. Calathe’ste mabde buhone leşan dmidoci a celotho dqdiho i nurathe u rfidi a idicat du tboco froso keşoyo dsim sabotage.

Elo b’Mersin msik farsufo dıkmıthım dhawi celtho lu yuqdono du cobo. Meqım’ste mıthomowa i PKK dmawqadla cobe, elo i wazirutho di gawoyutho rfıdla hawxa idica u mawdacla di celtho rişoyto kiba dhuwyo i şhantho yaqırto dhawyo adşato.