Mawdıc calu husrono dıtrelın ahçome da hayle kaboşe d’Turkiya cala qıryawotho di fnitho d’Tel Temır

Dafe frişe du nawlo, frıslın tebe calu husrono dıtrelın ahçome da hayle kaboşe d’Turkiya cala qıryawotho di fnitho d’Tel Temır-betynothaye qıryawotho du camaydan.

Ba tebe dıfrısle u Fond d’Barnabas, i dafo d’AsiaNews u Hawar, grışlın u zuhoro cala hçomani d’Turkiya cal Tel Temır ubı qaşyutho krihi a husrone dıtrelın a hçomani cala bote u calan arcotho da comure di fnitho.

U Fond d’Barnabas dkıtyo u qentrunayde b’Britania u dkıtyo şutoso dıkmcadır a Mşihoye, frısle tebo rwiho bi dafayde du nawlo cala hçome dsımlın a hayle kaboşe d’Turkiya wa marhıbonathe cali qritho du camaydan Tel Tavil ucala qıryawotho hrene dkıtne bi fnitho d’Tel Temır bi Gozarto d’Bethnahrin bu yarho dşafıcina.

Ba tebani mawdıc; Qritho du camo Othuroyo bu garbyo d’Suriya, mido nişo lhçomo qaşyo 30 bu yarho d’Ob ma hayle oyaroye d’Turkiya bu taro da cuqobe dıksaymo Turkiya calu gerilla di PKK. Bu hçomano’ste, mahrawla Turkiya ğalabe dbote u hiw’ste husrono lğer qıryawotho d’Tel Temır. Ba hçomani a haroye dsimi cala qıryawotho du Xabur noşo lo qtil elo mçarıh 5 mdinoye, wa hrene malhaqlın dmahzımi meqım ma hçomani.

Ba tebani mahke cal ha man abne du camaydan d’mırle; A hçomani d’Turkiya b’Suriya u nişathe du camaydan dmahzım ma dukothayde’yo ubu şıkılano kmitaşe cayni şıkıl d’siyase xıdu zabno du qtolğenso dan 1915 calu camaydan u bıthır cayni mede’ste bu zabno da ğrobe marhıbone d’Dacış ba 2014. Bebzabno i dafo d’Hawar frısle taşroro u mahkela cala hçome dsımla Turkiya cala qıryawotho frişe di fnitho.

Hawar grışla u zuhoro u mawdacla bşıkıl detaj cala hçomani d’Turkiya dsimi baroyo cala dukotho da mdinoye u dmşarewolın heş mu şuroyo du yarho d’Ob d’şafıcina uholucdo. Hawar, rızle u mathkarle a qıryawotho dsim hçome aclaye wu husrono dtrelın a hçomani cala mulkone da comure; beynothaye Dardara, Tel Şamiram, Zergan,Tel Hafyan, Tel Tavil uğer.

Hawar m’akakdleste, leşan u sutoro qonunoyo da qıryawotho di fnitho-u Mawtbo Folhoyo d’Tel Temır, u Mawtbo Folhoyo Suryoyo wa hayle d’QASAD huwlın ağono caşino leşan u sutoro da comure d’Tel Temır.