Klozım u Huyodo d’Urifi dwele kleyto mhayadto mqabıl d’Turkiya

İ şultonutho du Yawnan mawdacla dıkmaydo dhowele u Huyodo d’Urifi klayto mhayadto mqabıl da fulhone lo qonunoye dıkmaşyo Turkiya bnişo dımqafyo nafto u ğaz bu madınho du yamo Mescoyo.

 Camgabıdathe, i şultonutho d’Spanya mawdacla dıkrufdo a fulhone dıksaymo Turkiya bu yamo Mescoyo, cal dlıkımcadri bu şroyo du krizayda dcamu Yawnan ucam Qufrus.

 U rişwazire du Yawnan Kiryakos Mitsotakis, mawdacle dıksonıd kulonoyith i klayto du rişono d’Qufrus Nikos Anastasyadis, dsımle qroyto du Huyodo d’Urifi dmahıt klayto mhayadto mqabıl da fulhone lo qonunoye dıkmaşyo Turkiya leşan u kroxo dcalu nafto ucalu ğaz ba thume da maye d’Qufrus.

Meqım mathe’ste, u waziro di baroyutho du Yawnan Nikos Dindyas, mawdacle dıksonıd i qroyto d’Qufrus dmitahıt tedbire hathe mu Huyodo d’Urifi cal farsufe u şırkat dıkmıştawtıfi la fulhonani d’Turkiya. Dindyas bıthır ma droşe dhawile camu baramnayde d’Qufrus Nikos Dolides, mawdacle di sbutho dmitahıt tedbire momunoye cal Turkiya, klozım dımdawım dfoyış bi tahrazto da fulhone d’Urifi, en dımdawmo Ankara ba fulhonayda du krozo dcalu ğaz bu yamo Mescoyo.

Me gabo hreno, i wazirto di baroyutho d’Spanya Aranşa Gonzales Laya, mawdacla du athrayda krofıd a fulhone dıksaymo Turkiya b’şıkıl ihidoyo bu yamo Mescoyo, u mathkarla’ste da fulhonani tırpılto’ne qum da bazare du şroyo du krizano dmaqşele i mwatyutho bu qlimo. Gonzales mahwela’ste u snodayda l’Qufrus dkıtyo athro hadomo bu Huyodo d’Urifi mqabıl da fulhone dıkmaşyo Turkiya.

Gonzales bıthır ma droşe dhawila camu waziro di baroyutho d’Qufrus mırla; Ahna lıkmıtyaqnina dkito şroyo mxasra hdo la qetre du madınho du yamo Mescoyo. Ahna krıfdina a fulhonani dıkmisomi b’şıkıl ihidoyo dlıkımcadri bu qefoyo du şroyo du krizano.