02/10/2020

Turkiya kıbco naqlahreto dseymo qtolğenso cala Armınoye

İ wazirutho du sutoro d’Armenya mawdacla dmadrela tarte tayısyotho du haylo oyaroyo d’Azerbaijan bu qlimo d’Nagorno Qarabax, u makadlaste da taxtuşe bı qaşyutho kımdawmi ba gbine mşahılfe du qrobo.

 Me gabo hreno, i şultonutho d’Armenya thımla Turkiya dkımhalxo laf qtolğenso hatho calan Armınoye. U camgabıdathe, Fransa makadla d’Turkiya mşadarla ba mowat d’marhıbone d’Suriya l’Azerbaijan.

 İ malılto di wazirutho du sutoro d’Armenya Şuşan Stipanyan, bi maqırhonutho dıfrısla bi dafayda, mawdacla da hayle du sutoro d’Armenya dkıtne masre bu gayso d’Qarabax madrelın athmıl helikopter u tayosto dılo pilot du gayso d’Azerbaijan, wa 2 tayosyothani nafili banarcotho dkıtne bi morutho du gayso d’Qarabax. Stipanya mawdaclaste da taxtuşe kımdawmi ba gbine du qrobo, wu gayso du sutoro d’Qarabax maklele ahjome du gayso d’Azerbaijan bnişo dşofıc lanarcotho du qlimo.

Camgabıdathe, u rişwazire d’Armenya Nikol Paşinyan thımle Turkiya dkımhalxo naqla hreto laf qtolğenso hatho calan Armınoye, u mırle; İ aykanoyutho ducdo kımathlo qento zıtır ma taxtuşe dhawınwo bi şato da 2016. Uqrobo ducdo kşowe dımqasinale bu mede dhawiwo ba 1915 dıqtılwo zıd me mılyun u 500 alfo Armınoye bu qtolğenso qamoyo du doro da 20. Paşinyan bi maqıblonutho dsimo acme, maglele d’Turkiya ksındo u gayso d’Azerbaijan b’tayosyotho du qrobo, bı tayosyotho dılo pilot, u kımşadro l’Qarabax mşawrone folhoye Turkoye u sniqwotho du qrobo cam marhıbone.

Armenia tlıblaste me İsroyel, dmitakle u zebono da zayne l’Azerbaijan. Mxasra hreto, u rişqutno d’Fransa Emanuel Macron makadle d’Turkiya nqila hedor 300 mzayne Suriye mi mditho d’Cıntap l’Baku b’Azerbaijan, u mawdacle da tuxmonoyani dımşadri, masrene cam grub marhıbono dkıtyo hfito b’Holob. Macron mawdacleste dkito grub hreno dıkmişakıl me mowat d’marhıbone Suriye kmitayıb ucdo leşan dmişadır l’Azerbaijan.

Me gabo hreno, u malolo du gayso Athronoyo d’Libya rabhaylawotho Ahmad Almismari, mawdacle d’Turkiya knıqlo ucdo me Libya l’Azerbaijan grube d’marıhbone me Suriya ume ğensıwotho hrene. Almismari bu mamlo dsımle mzaharle calu qento rabo dkito bu macırbo d’Libya, cal da botaytawso dkıtne kbişe ma grube marhıbone knuqli noqufe lgawe d’Libya u larwal du athro.