09/12/2020

Kmisım hboso cal Pashinyan laşan d’mıstacfe

A tagliyotho da gabe saqıbloye, kımdawmi mqabıl du rişwazire d’Armenia Nikol Pashinyan, bıthır mıd lo matıcle lu zabno dmahıtwo qume leşan dmıstacfe mi wolithayde.

 Bebzabno a tre fatıryarxe dan Armınoye’ste sımlın qroyto lu rişwazire Pashinyan, dtore mi wolithayde u dfotıh u darbo qum du tuyobo d’guboye gawonoye hathe.

Koalisyon dhol 16 gabe frişe d’Armenia wa noqufathe acmaye, kfixi adyawma’ste la zabuqone di arişkoyto Yerevan u mahwelın hfuxyo lu rişwazire Nikol Pashinyan, dlo mtabaqle u ultimatum dmahıt qume-awkith u zabno dmahıtwo qum du rişwazire dmıstacfe mi wolithayde, u dfotıh u darbo qum da guboye du parlamento.

U zabno dmahıtwo yawme d’Cruto qum Pashinyan u athmıl kamıl ubu ultimatum mawdacwo; Ya gıdmıstacfıt mi wolithaydox, dlo’ste gıdmitabde tagliyotho mqabıl didox bu athro kule. U hfuxyano mqabıl d’Pashinyan mşarewole, calu şıkıl dmıdle i sbutho du qrobo d’Qarabax l’ide u d’xasır u qlimo, u mınyono dan Armınoye dqtili wu husrono dhzele u camo.

Pashinyan’ste holucdo rfıdle a qroyotho di isticfa u mawdacwole dkıtyo bfusqono kamilo dımdawım bi tahraztayde dan 6 yarhe, leşan dmarkıw i mşaynutho bu athro. Bu zabno da tagliyotho dsimi athmıl’ste, nafıq taxtuşe beyn da mtagliyone udu polis u msik ba casrowat dfarsufe, elo bğer dukotho şafici a tagliyotho b’şalyutho.

Camgabedathe u fatıryarxo di cito Armınoyto Orthodoksoyto Karekin II hawile athmıl ytawto cam Pashinyan u tlıble mene dmıstacfe mi wolithayde u sımle qroyto lu parlamento dımhalıq dawse lu tuyobo da guboye. U fatıryarxo sımle qroyto lu camo uli saqıbloyutho dfayşi rahuqe ma provokasyone umu cnufyo.

Bebzabno u fatıryarxo Armınoyo du Bayto d’Kilikya Aram I tlıble mu rişwazire Pashinyan dmıstacfe mi wolithayde u dobe aftho dmisım guboye şnize bu athro leşan u camo dnofıq mu krizano udı qodır dcoyış b’nihutho. U fatıryarxo mırle; Lo belhude mvayaclan sahmo rabo me Qarabax, elo u camo mvayacle’ste sahmo mu şubhorayde umu neshonayde.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…