09/12/2020

U fağro du hasyo Mor Selwanos mowbıl l’Hımıs

İ fatıryarxutho d’Antiyuxiya u dkule madınho di cito Suryoyto Ortodoksoyto, mawdacla du fağro du mnohnafşo tlithoy tube hasyo Mor Selwanos Bıtrıs Alnıcme, mawbıl athmıl li cito d’Yuldath Aloho d’Im Alzınnar bi mditho d’Hımıs, laşan dqathlın an’abne di marcitho i boruktho harayto mene.

 Bebzabno, i fatıryarxutho dı Darımsuq mawdacla du fağro du mnohnafşo gıdmicafe ramhıl bi qastra d’Sadad dmawladwo eba.

 U konvoy du fağro du mnohnafşo tlithoy tube hasyo Mor Selwanos Bıtrıs Alnıcme, mıstaqbıl athmıl b’zawho tawdithoyo u camonoyo dımtayıb bi mditho d’Hımıs b’Suriya, bi mıştawtfonutho d’hsayo u kohne u rişone d’marciyotho da citotho mşahılfotho du camaydan, cami gudo da boduqe Suryoye di cito d’Im Alzınnar u menyono celoyo ma n’abne di marcitho d’Hımıs ud’Hama u hedoraye.

U fağro di mcalyuthayde, adyawma mi şuctho da 10 dsafrayto huli şuctho di hdo d’falgıdyawmo, umi şuctho da n’arbac huli şuctho da tmone d’casriye mahıt bi cito d’Yuldath Aloho d’Im Alzınnar b’Hımıs, laşan dmaydi an’abne di marcitho i boruktho harayto du fağrayde.

Bebzabno, i fatıryarxutho mawdacla di slutho du çınnaz dcali ruho du mnohanfşo hasyo Mor Selwanos, ramhıl gıdmisomo bi cito d’Im Alzınnar bi şuctho da 12 dfalgıdyawmo. Ubıthır mathe gıdmicafe u fağrayde bi qastra d’Sadad dmawladwo eba u tlithoy tube. Camgabıdathe, u qerowo da tlotho yawme dcali ruhayde gıdmisım yawme d’Cruto dıbqamuthayna ba şoce d’safrayto bi cito d’Im Alzınnar dkıtyo bi şawtho catıqto d’Hımıs. Uabroyo bıthır mu qerowano gıdmitaqıbli a’buyoye bu salon di hasyutho.

U tlithoyo tube mnohnafşo hasyo Mor Selwanos Bıtrıs Alnıcme, mawladwo i şato da na’1968 bi qastra d’Sadad dıknıflo bu tayman madınho d’Hımıs ma tre abohe mhasyo Cisa Alnıcme wi bethzawgayde mhasayto Sacda Alcabbud. U ışmo cılmoyo du mnohnafşo Tawfiq we, ukıtle ha ahuno u tltoh ahwotho dkıtne: Fahıd, Maryam, Fidda u Nur.

İ mcalyuthayde qrewole falqo mu maşıqlo şarwoyo du yulfono bi qastra d’Sadad, ubi şato da na’1977 azzewo la bethyatme da Suryoye Ortodoksoye b’Hımıs, u tamo mkamewole u maşıqlo şarwoyo bi madraşto d’Mor Jırjıs wu maşıqlo mescoyo du yulfono bi madraşto d’Nasib Carida. İ şato da na’1984 mıştawtafwole li dayro d2Mor Afrem di kohnutho bı Darımsuq, ubi şato da na’1996 qayıhtwole sohdutho du majıster bu haqlo bu haqlo di thiyoloğiya mi bethsawbo d’Athina. Ubi şato da na’1999 masrahwo bi cito d’Im Alzınnar hasyo li marcitho d’Hımıs ud’Hama u hedoraye bu ışmo d’Mor Selwanos Bıtrıs Alnıcme bu syomido du tlithoy tube mnohnafşo fatıryarxo Mor İğnatiyos Zakay Qadmoyo Bethciwas.

İ mcalyuthayde mıştawtafwole lı lumode gawoye u emwothoye, u kıtwole buhone u turgome ruhonoye mşahılfe cali iqartho, cali athto u cali claymutho. Ukmahwewo yasifutho rabtho li claymutho bu darbo da qentrune di tarbitho tawdithoyto di marcitho.

Check Also

Fatıryarxo Yunan sımle socurutho li mditho d’Alqaryatayn

İ qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan…