Kmitahrıw u Sur d’Omid dkıtyo maktabzabnoyo

A kefe dıknufqi tahte da bınyone dmahrıwi hedor u şuroyo du Sur makthabzabnoyo d’Omid, kmınqoli ba kapjat uba qamyone du hforo.

 Mşalo mi qelayto da macmırone mawdacle da fulhone dıkmisomi ba makinat rabe du fulhono, kobın hısrono lu şuro makthabzabnoyo

U şuro d’Omid bu hethotho dıkmisım me 10 bu yarho d’Ob di şatathe hiw fusqono dmıshıf 41 bınyone dkıtne hedore. Ba dkotho dsim u shofo ba bınyonani mawdıc dımqafe athare makthabzabnoye. U mawdıcste bu asas da bınyonani mıstacmalwo kefe du şuro d’Omid.

U hiğmuno d’Omid wu rişono di karxutho dkıtyo qayum awkith dmasrıh li wolitho mu rişqutnu Turkoyo Erdoğan mırwolın; A kefani du şuro gıdminaqın u gıdmitıstacmıli bu hethotho du Şuro. Elo a kefe dnafiqi kmitahti ba qamyone du hforo u kmitawfıqi me tamo, u latyo idico layko mawbıli.

Kmitawdıc a fulhonani du hethotho kmisomo ma arkeolog u ma yadıcthone du makthabzano elo kmisomi ma makinat rabe du fulhono. Bi netije, a kefe dkıtne bu cımqo du Şuro latne bdukthayye, u mcal fothe du medano hawi herowo bu Şuro. A dkothani dıklozım dmisım u fulhonaththe bzuhoro rabo elo, kmisım ba makinat rabe u lıkmitahwelın ulsoyutho.

Cali aykanoyuthathe i qelayto da macmırone mahwelın u keşlo wi lo thınihutho dkıtlın u kmawdıci, u şuro dkıtyo bi yortutho dı britho bu şıkılano gıdhoze husrone.

U şuro d’Omid dkıtyo 9 alfo ışne catiqo, bıthır mu şuro du Sin u şuro rabo u rwiho dsim bı britho leşan di mşaynuthoyo. U şuro d’Omid bzabne mşahılfe mawrıw u marwıh ma came mşahılfe, elo idicoyo a macmırone qadmoye du şurano a abne du camaydanwın. Wu şurano bi şato da 2015 cabır li lohitho di yurtutho dı britho d’UNESCO.