Kmıthomo Turkiya dıkımşadro jataviye l’Libya u l’Urifi

U menyono da çatawiye dkımşadrolın Turkiya lu athro d’Libya mati l’4700 farsufe.

 Callathe, Rusya mawdacla du Turkiya kımşadro a’marıhbone du gbino d’Alnusra mi fnitho d’İdlıb lu athro d’Libya.

 İ mşatasto d’Suriya da zedqe noşoye dkıtyo u qentrunayda b’London, mawdacla du menyono da çatawiye dkımşadrolın Turkiya li erişkoyto d’Libya Tarablos yasıq l’4700 çatawiye, ube bzabno u menyono da çatawiye dıksaymi ucdo duroşe ba maşıryotho folhoye dı Turkiya mati l’1800 farsufe.

Lfuth i mşatasto d’Suriya, a’çatawiye dı Turkiya hadomene ba grube mzayne saqıbloye d’Suriya, baynothaye u grub d’Liwaa Almuctasem, u grub d’Alsultan Murad, Şiwaa Sıqur Alşam, Al(h)amzat, Faylaq Alşam, Sulayman Şah u Liwaa Alsamarqand.

Be bzabno, i mşatasto d’Suriya ruşmoyith mawdacla du menyono da çatawiye dı Turkiya dıqtili ba qrobe dı Tarablos mati l’800 qtiloye.

Camgabıdathe, i mşatasto d’Suriya da zedqe noşoye mawdacla dkito hedor 64 çatawiye dınqili m’Libya li qıtca d’Urifi, u hani kımşakli tehdid rabo la n’athrawotho du Huyodo d’Urifi.

M’gabo hreno, u waziro di baroyutho d’Rusya Sergey Lavrov makadle dı Turkiya kımdawmo dnıqlo çatawiye mi fnitho d’İdlıb lu athro d’Libya, bnişo dmıştawtıfi lu qrobo b’Tarablos.

Lavrov mawdacle ste du nqolo d’mowat çatawiye lu athro d’Libya baynothaye a’grube marıhbone du Gbino d’Alnusra, kmazidi i lahbe du qrobo b’gawıd du athrano.

Lavrov mırle ste “Rusya hiya balhude layba dşıryo u qetrano, ubalhude kiba dımtalbo dmitafiti la haye a’qyome dcal İdlıb. Mosko kımbahso ucdo i sbuthathe cama şorikayda dı Turkiya”.