Kmizabni a dukotho du cameydan bı timo nohuto b’ Mawsal

Bu zabno da ğrobe marhıbone d’Dacış kbışwolın d’Mawsal, huwolın husrono rabo li mdito. Walaw u qrobo tayım u dmabdın a fulhone du bnoyo u du hethotho d’dukotho d’Mawsal, i şawtho catıqto di mditathe heş shifothoyo.

 Calathe a more da bote u dan arcothaniste, kımnasın dmalizi leşan dımzabni a mulkonathe b’timo nohuto. Meqım mu qrobanoste, ğalabe ma dukotho di şawtho catıqto d’Mawsal, du camaydanwın.

İ şawtho catıqto d’Mawsal, heş harbotho u shifothoyo bıthır mu husrono dıtrele u qrobo dhıwo mqabıl du tukoso marhıbon d’Dacış. Wu lfuth u mede dıkmahweste i şultonutho latla plan dımhathıtho i şawthathe mcal fothe du qetro momunoyo dkıtla. Calathe a farsufe dheş khoyın bi mdito, kımnasın dımqafın noşo d’zowın a bote wa mulkonathe b’timo ğalabe nohuto.

İ şawthathe mxamaltoyo ba citotho, ba zabuqone uba bınyone catiqe, elo cal di şawtho heş ğalabe harıwto’yo, noşo lıkobıc dmahıt zuze u dzowın bote u arcotho eba-hem cal dheş kito şlade da mithe beyn da shifotho udkothe rehaye wu hemste cal dkito foqucotho dheş lo mahrıwi eba.

Ha man abne du camaydan Saad Gorgis dkıtyo 62 eşne mırle; Hani yarhe, kımnaseno dımzabano u baytaydi dkıtyo bi şawtho catıqto, cal dkıtyo ğalabe hariwo u dlıkqodarno dfaşno ebe. Elo noşo lıkobıc d’zwowanle, cala da bothe dhedore kulle hariwe’ne u kothe reho menaye.

Gorgis dıhzewole zabno d’3 eşne i barbroyutho d’Dacış mırle; İnaqla dıkdocarno lu bayto, kothe lboli i barbroyutho qşitho d’Dacış-a qatle, a furqoce wa idame dsimi ba zabuqonani. U baytano zwınwoli meqım mu qrobo b’60 milyone dinare-awkith hedor 50 alfo dolare, elo ucdo latle qime d’ruco du timawo. Mıqa dtlıblan snodo u tazminat mi şultonutho dbonina a botaydan, noşo lo huwlelan adno.

Ğalabe ma dukothani dkıtne du camaydan, kmizabni b’timo nohuto u kull kvadrat metre kmizabın beyn 75 uhol 200 dolare. Uğer farsufo zwınle 200 kvadrat metre d’arco b’20 milyone dinare-awkith bhol 100 alfo krone du Swed. A comre di şawtho d’Mawsal, lıkubci dtorın a dukothathe elo kmıjbori, mcal fothe di bsirutho di mcadronutho di şultonutho d’Boğdod.