Kowe mamle mşahlıfe ma folitiqore du Swed calu Sayfo
İ sbutho du tenkiro du Sayfo du camaydan dan 1915 mi wazırto di baroyutho du Swed Ann Linde, mati lı darğo dxolıq renye mşahılfe beyn du gabo da Sosyal demoqartoye dkıtne bi şultonutho du athro.
İ rişay karxutho d’Södertelje Boel Gudner dkıtyo mu gabo da sosyal demoqratoyo bi maqırhonutho dhula lu frosqolo du Swed mırla; U Sayfo dhawi cala Othuroye-Suryoye, qtolğensowe.
Bıthır mi maqırhonutho dhula i wazırto di baroyutho du Swed Ann Linde dmankarla u Sayfo, i rişath karxutho d’Södertelje Boel Godner mawdalca lu frosqolo, dıknufqo mqabıl di wazırto di baroyutho u kımmo; U qtolğenzo hawi calu camo Suryoyo Othuroyo, u calu camo Armnoyo hano latyo mede dbelhude kmitamır’yo u mawxa i wazırto di baroyutho klozım dobo maqırhonutho trısto leşan a nubğe du Sayfo dmitaqıbli u dhowın thnihoye.
Me gabo hreno folitiqoro catiqo da Sosyaldemoqratoye Metin Rhawi’ste hule maqırhonutho calu tenkirano di wazırto di baroyutho Ann Linde u mırle; Kull farsufo dkobıc dmıstacmıl u Sayfo li siyasayde-klozım dminakıf. Rhawi bi maqırhonutheyde kısoyım qrayto li şultonutho dmawdyo bu Sayfo dan 1915.
Bebzabno bi kthawto dkthule Rhawi li hadımto da Sosyal Demoqratoye Maria Hindi Aliias d’nafiqo mqabıl di wazırto di baroyutho Ann Linde dmankarla u Sayfo komarla, Şroro’yo, a cuhdoneydan’ne dı qtili ubı plan qtiliwo wa mbahnone mthabatlın dkıtyo qtolğenzo u latyo mede hreno.
Me gabo hreno u tboco froso du Swed kımdawım dforıs tebe cala renye d’Maria Hindi Aliias dıkmdafco calu Sayfo. İ Maria bi egartho d’kthuwla bu tbocofroso li wazrto di baroyutho kımmo; Hol yawme d’Huşabo-i wazırto dlobo funoyo, gıdthuwono kthawto mqabıl di wazırto u gıdmaqimono hın ma Sohude leşan dmahkın i şrorutho li wazırto.