Kriho Turkiya cal dıkmankıro u qtolğenso di şato da 1915

Tukose u şutose frişe du camaydan, dan Armınoye uda Yawnoye, krıhlın Turkiya cal dkımdawmo dımankıro u qtolğenso dsim aclaye ban 1915.

 Bi maqırhonutho mşawtafto dıfriso ma tukose u şutosani bu tbocofroso Emwothoyo mawdıc, du rişqutno d’Turkiya Recep Tayyib Erdoğan wi şultonuthayde heş kımdawmi dımkarıri u tenkiro du qtolğensano dsımlın an abohothathe cala came Mşihoye şerşoye.

 U Komisyon Athronoyo dan Armınoye b’Amerika u fırco du macırbo du athro wa şutose bnayqyomo; beynothaye şutose frişe du camaydan, da Yawnoye, tukose frişe da Yudoye, u tukoso Emwothoyo İn Defence of Christian, Philos Project uğer, frıslın maqırhonutho mşawtafto u krıhlın u qedomo d’Turkiya li sbutho du qtolğenso dsımwola i mamlaxtho da Cuthmanoye cala Mşihoye bu zabno du qrobo qamoyo dıbritho.

A şutose u tukosani mawdaclın u hfuxyathe u sımlın u rişqutno Turkoyo Recep Tayib Erdoğan wi şultonuthayde sturyo naşifo, cal dkımdawmi dmankıri u qtolğenso dsim ban 1915 cala came şerşoye u Suryoyo-Othuroyo, Armınoyo u Pontusoyo u mırlın; Beyn di şato 1915-1923, qtılwo bşıkıl barbroyutho rabtho hol 3 milyone d’Mşihoye mi mamlaxtho Cuthmanoyto dkıtyo Turkiya dadyawma. Belhude Turkiya wu muttafikayda Azerbajian u anathrawotho rişoye dıkmankıri bşıkıl hfito u hawbano dsim mqabıl di noşutho.

A tukose u şutose mawdaclın, di daira du mtoyo bi rişqutnutho d’Turkiya frıswola maqırhonutho 16 bu yarhano cali ytawto dhawyowa beyn du Mawtbo celoyo da mşawrone udu rişqutno Erdoğan bıthre da tarce sxire. U knuşyano mdawamwole 5 şoce wi sbutho rişoyto di ytawtatheste, i dawse hathto dgımhalqo Ankara bu haqlo di siyase du tenkiro du qtolğensowa.

I sbuthathe dmido li ido me Turkiya, netije da fulhone dıkmisomi bı britho leşan i mawdyonutho bu qtolğenso u dmıtlıb kinutho mqabıl du hawbanoyo. Bu huthomo di maqırhonuthathe da tukose u şutose, bşıkıl rwiho mahke cala qatle sistematik dsımwola i mamlaxtho da Cuthmanoye cala came şerşoyo du qlimo, dkrih bı qaşyutho me hol 30 athrawotho frişe dbritho u tlib me Turkiya, dmaqbılo u makthabzabno catumayda u dmaydo i mşaluthayda mqabıl da hawbani dsimi cala 3 came Mşihoye di mamlaxtho.