Lavrov sımle qroyto lu kenşo Emwothoyo leşan u sutoro da Mşihoye dıkmırdofi bu Madınho Mescoyo

U waziro di baroyutho d’Rusya Sergej Lavrov, sımle qroyto lu kenşo Emwothoyo dmacle qole, leşan u sutoro da Mşihoye dıkmırdofi bu Madınho Mescoyo.

Lavrov mawdacle’ste, di wazirutho di baroyutho wi cito Rusoyto Orthodoksoyto, kımaşın tarmıyotho frişe bi sbutho di mşaynutho da Mşihoye.

Bi maqıblonutho dsımle u froshezwo Rusoyo camu waziro di baroyutho Sergej Lavrov, kali dilonoyith cali aykanoyutho da Mşihoye u mırle; U kenşo Emwothoyo klozım dmacle qole leşan i mşaynutho da Mşihoye dıkmırdofi bu Madınho Mescoyo ubu garbyo d’Afriqya. U qetrano da Mşihoye klozım zıttır dmişalıt bahro acle.

Lfuth u waziro Rusoyo, i wazirutho di baroyutho wi cito Rusoyto Orthodoksoyto kımaşın fulhone u tarmıyıotho frişe camhıdode b’haqle frişe wu hdo ma tarmıyothani’ste, u duyoqo di mşaynutho da Mşihoye-dilonoyith bu Madınho Mescoyo ubu garbyo d’Afriqya’yo.

Lavrov mawdacle dgımtaybi orucutho lu snodo da Mşihoye wu droşano gıdmisım mşawtıfo beyn di sictho da esore baroye di fatıryarxutho Rusoyto bu zabno dgımisım u knuşyo du Tukoso di Mşaynutho udi Methcadronutho b’Urifi udu Mawtbo Celoyo da Zedqe Noşoye d’Emwotho Mhaydotho.

Bu mamlayde Sergej Lavrov mawdacle du forumano, gıdmalım mathlone mu Vatikan, wazire di baroyutho d’Armenia, Hungaria, Belarus, Lebnon uğer athrawotho hrene wi sbutho rişoyto da droşani’ste, dmitaklıyo i golutho u dmi’amni a haye wa dukotho da Mşihoye bu Madınho Mescoyo’yo.

U waziro Rusoyo mırle; Ba mo alfayo d’Mşihoye mahzamlın ma dukothathe-bi qamayto mu Cıraq, bıthır Suriya u Libya. U qrobo gawoyo d’Suriya m’atharle ğalabe mrimono cala Mşihoye wu athrano-meqım dargışto di Mşihoyutho’wa. Calathe ulsoyo’yo dımşaltina bahro u dımnasena dımqafena şroyo lu qetrano u dmaklena a rdufye wu cnufyo dıkmisım cala Mşihoye.