Macenzi mawdacle d’Amerika fayıştoyo bu Iraq

İ wazirutho du sutoro d’Amerika u Pentagon mawdacla du rişwazire du Iraq Mustafa Alkazimi sniqoyoyo li mcadronutho d’Amerika, wa haylawotho Amerikoye fayoşene bu Iraq.

 Camgabıdathe, i wazirutho di baroyutho d’Amerika mbayanla raqme da talafone, laşan baroye dmitahwe mawdconwotho cala gunhe dıksaymilın a noture qawmonoye du İran.

 U rişono di mdabronutho qentrunoyto d’Amerika rabhaylawotho Keneth MaCenzi, bıthır mıdlaqi u rişwazire du Iraq Mustafa Alkazimi bı Boğdod, mawdacle d’Amerika sniqoytoyo ucdo dımcadro u rişwazire hatho, u grışle u zuhoro cal fusqono Iraqoyo dıkmıntır laşan dfayşi a’haylawotho Amerikoye bu Iraq, udımcadri Alkazimi bu nfoqo mqabıl du tukoso marıhbono dı Dacış.

Rabhaylawotho MaCkenzi dımwasafle a’fulhone dıksamlın Alkazimi mırleste “u rişwazire hatho du Iraq mhalaqle dawsat ulsoye du nfoqo mqabıl da grube mzayne dıkmısnodi mu İran udsımlın hjome cala haylawotho Amerikoye. Amerika klozım dhuyo msaybıronitho bu zabno dıknofıq Alkazimi mqabıl dı grube dkıtlın haylo folhoyo u folitiqoyo rabo ğalabe”.

MaCkenzi bi maqırhonutho dhule la gelyunore bıthır mi ytawto dhawile athmıl cam Alkazimi, mawdacle dkıtle tuxlono di şultonutho d’Boğdod gıdtılbo ma haylawotho Amerikoye dfayşi bu Iraq, cıl mıdkito qroyotho ma qoyume Iraqoye dmıgroşo Amerika mu athro.

Camgabıdathe, i wazirutho di baroyutho d’Amerika mbayanla bi dafayda du Twiter raqme da talafone, laşan baroyo dmitahwela mawdconwotho cala fulhone marıhbone dıksaymilın a’noture qawmonoye du İran ba nathrawotho Caraboye.

İ wazirutho di baroyutho d’Amerika mawdacla da noture qawmonoye du İran ksaymi gunhe cjiqe bhaq da mdinoye bu darbo da wakile dkıtlın bu madınho mescoyo, u athımlaste u rejim du İran dıknofıq mqabıl du mawtbo di mşaynutho d’Emwotho Mhaydotho ukımşadır zayne la grube u tukose marıhbone dkıtne ba nathrawotho du madınho mescoyo.

Bebzabno, i wazirutho Amerikoyto sımla qroyto lu mawtbo di mşaynutho dıklozım dmawrıx u fusqono dıkmonıc u şedoro du zayno lu İran, u tlıblaste mene dımdawım dsoyım hboso cali şultonutho dı Tahran hul dımşahılfo u qedomayda bu qlimo du madınho mescoyo.

İ qroytathe d’Amerika athyo luhwoyo bıthır mıdşafıc yawmo calu suikast du qatlo du mbahnono Iraqoyo bu haqlo di mşaynutho Hişam Alhaşimi dıqtılwo lumıhreno qum du baytayde mhın farsufe mzayne dıkmıthomi dkıtne masre camu İran.