Macron gıdsoyım socurutho l’Lebnon laşan soyım hboso cala folitiqoye

A mıştawtfone lu lumodo emwothoyo du snodo du camo d’Lebnon dımtayıb athmıl bu darbo du nawlo, hulın şudoyo dgımqadmi hedor 260 mılyune Euro laşan dmicadır u camo dıhzele husrono bu furqoco du lmino d’Bayrut.

 Camgabıdathe, u rişqutno dı Fransa Emanuel Macron dkıtyo u mtaybono du lumodano, mawdacle d’Lebnon xıd athro laybe dqathle i mcadronutho dıkmıntoro ida dlısoyım aşuhlofe dıkmıtlobi mene. U bebzabno Macron mawdacle dgıdsoyım socurutho l’Lebnon bu yarhano, laşan dsoyım hboso cala rişone folitiqoye.

 İ rişızgadutho dı Fransa b’Lebnon frısla adyawma buyono cali netije du lumodo emwothoyo du snodo du camo d’Lebnon, dımtayıb athmıl bu darbo du nawlo bu insiyativ du rişqutno dı Fransa Emanuel Macron u du notarrozo d’Emwotho Mhaydotho Antonyo Guteres. Lu lumodano mıştawtafle 32 athrawotho, 12 tukose emwothoye u 7 tukose du kenşo mdinoyo d’Lebnon.

Bu şuroyo du buyonano griş u zuhoro calu lumodo emwothoyo qamoyo dımtayabwo 09 bu yarho d’Ob dşaficina, u dımbayanwo ebe mcadronutho noşoyto lu camo d’Lebnon dıhzele husrono mu furqoco rabo d’Bayrut. Bebzabno, amıştawtfone lu lumodo dathmıl makadlın dıkmahwın awyutho camu camo Lebnonoyo, u hulın şudoyo dgımqadmi 257 mılyune Euro laşan dmısnıd u camo Lebnonoyo sniqoyo bu haqlo du hulmono, du muklo u du yulfono u ğer.

Camgabıdathe, a mıştawtfone mahwelın ilo thınihuthathe mu şuhoro da buqore dımisomi calu furqoco dhawiwo bu lmino d’Bayrut arbıco bu yarho d’Ob dşaficina. A’mıştawtfone drışlınste u maşıqlo du bnoyo u hethotho du lmino wa şawthawotho dıhzelın husrono, u mahwelınste ilo thınihuthathe mi aykanoyutho momunoyto u kenşoyto haruto, u mawdaclın di kmoyutho di faqirutho b’Lebnon zayido b’zabno d’12 yarhe me 28% lı 55%, wu medano trele ğalabe Lebnonoye dımgalwın mu athro.

Megabo hreno, amıştawtıfone naqla hreto makadlın dkito sniqutho ulsoyto da rişone folitiqoye d’Lebnon b’surhobo dmotın lawyutho bi sbutho du şekolo d’şultonutho şarirto u mawthronitho dkiba dfulho laşan u yuthrono gawonoyo d’Lebnon calu asas di xarita du darbo dımbayanwole Macron ha bu yarho d’İlıl dşaficina, u dımaydowa ma hayle folitiqoye mşahılfe d’Lebnon.

Macron bu mamlo dsımle bu lumodano, mawdacle du athrayde b’fusqono kamiloyo dsonıd u camo d’Lebnon, u mırle dgıdsoyım socurutho lu athro d’Lebnon bu yarhano, laşan dsoyım hboso cala rişone folitiqoye du athro. Bebzabno Macron mawdacle dmid fusqono dmişatıs sanduqo awkith fond dıkmidabır mu bank emwothoyo, bnişo dımqadım i mcadronutho noşoyto la Lebnonoye.

Lfuth a hazoye folitiqoye, kamhwe hın ma rişone folitiqoye d’Lebnon lıkıbci dmitafito la haye i xarita du şroyo d’Macron, cal dkıtlın sabro di mdabronutho Amerikoyto hathto dımşahılfo i hzaytayda lafu İran, u bu şıkılano dgıhowelın aftho dımdawmi hınne dhowın morıd du fusqono siyasi d’Lebnon, u dmafiti la haye i tahrazto dkıtle u İran bu qlimo du madınho mescoyo.