Mqadım rmoyto dmitathkır u qtulcamo d’Simele
Grub d’hadome bu mawtbo tahtoyo di kongre d’Amerika, mqadamlın rmoyto dıktulbo dmitathkır u qtolcamo d’Simele dsımwo ban 1933 u dnafılwo eba zıd me 300 alfo sohde mu camaydan du Iraq.
İrmoytathe dmıdle u insiyativayda qoyumto Debbie Lesko, ktılbste dmitanhır u camo Amerikoyo cali şrorutho du qtolcamo d’Simele.
İ hadımto du mawtbo tahtoyo di kongre d’Amerika Debbie Lesko, mqadamla athmıl rmoyto li kongre dıktulbo mi mdabronutho d’Amerika dmathkıro u qtolcamo d’Simele dsımwo bu zabno dıqtiwolın a hayle Iraqoye hedor 3 alfo farsufe mu camaydan beynothaye neşe u nacime u gabre, u shıfwolın hol 60 qıryawotho Othuroye bu garbiyo du Iraq ban 1933.
İ rmoytathe krıfdoste kul şıkıl dfulhono dıkmasır i mdabronutho d’Amerika bu tenkiro du qtolcamo d’Simele, u bebzabno kımşajco dmitanhır u camo Amerikoyo calu qtolcamano. İ hadımto di kongre bi rmoytayda mırla; U camo Othuroyo cayış casqutho ğalabe ba maşıqle mşahılfe du maktabzabno, beynothaye u qtolcamo barbıroyo d’Simele. Kıtli sabro di rmoytathe dgurşo u zuhoro cala gunhe barbroye dhawınwo ban 1933, bnişo dqudrina dşıfcina a tedbire wa siyasat dhawınwo celtho lu qtolcamano.
Li rmoytathe dımqadmola Lesko, mıştawtafleste 4 hadome hrene bu mawtbo tahtoyo di kongre d’Amerika dkıtne: Anna İşo, Josh Harder, Skot Perri u Prad Şerman. İ sbutho du camaydan u Othuroyo du Iraq, lo mıdwola i yasifutho dıkmıntarwo me Britanya u Fransa dflığwolın i mamlaxtho Cuthmanoyto beynothaye l’menyono dathrawotho; xıdu Iraq, Suriya, Lebnon u Fleşt u ğer ban 1916.
U camaydan bu zabnawo trewo xıd galwoyo bu athro du Iraq dımşataswo hatho. Ucamu zabno i şultonutho qamayto dımşatsowa bu Iraq bi rişonutho d’Cali Algelani mahwewola bceldboboyutho zıttır lu camaydan u Othuroyo ban 1933 i şultonutho bdewola kampanya qşitho da dugle mqabıl dan Othuroye, u kımdacyowa du camaydan mawqadle a geşre du Iraq u msamamle a mabuce da maye du ştoyo. U bu taro di propagandathe, i şultonutho du Iraq bıthır mıd grışwola u zayno du camaydan, sımwola u qtolcamo mahişono d’Simele.