Macron mzaharle Ruhani dlımdaxıl ba sebwotho gawoye d’Lebnon

U rişqutno d’Fransa Emanuel Macron, mzaharle u İran dlımdaxıl ba sebwotho gawoye d’Lebnon, u d’sonıd u şekolo d’şultonutho hathto da krize.

 Megabo hreno, Rusya mawdacla dıksındo dmiqafe şroyo folitiqoyo lu kriz d’Lebnon, u dlımisım mudaxala baroyto ba sebwothayde.

 U rişqutno d’Fransa Emanuel Macron ba esore dhawile bu darbo du talafon camu baramnayde Hassan Ruhani, mzaharle u İran dlowele mudaxala ba sebwotho gawoye du athro d’Lebnon bıthır mu furqoco dhawi bu lmino d’Beyrut.

Macron mamtele l’bolıd Ruhani, dıklozım ahayle wa nathrawotho qlimoye dlımaqşın i mwatyutho dkito bayn da Lebnonoye, u dlowelın mudaxala ba sebwotho gawoye d’Lebnon. Lfuth u buyono dıfrısla i rişqutnutho d’Fransa, Macron mawdacle l’Ruhani dıklozım dsonıd u şekolo d’şultonutho hathto dhuyo i wolithayda i mdabronutho du kriz ducdo dıkşofıc ebe Lebnon.

U qusro d’Elize mawdacleste d’Macron mırle l’Ruhani; Klozım a gabe wa hayle kulle dkıtlın tathir calu kriz d’Lebnon dmaqimi idothaye mu athrano, u dsındi ı şekolo d’şultonutho hathto. Camgabıdathe, i rişqutnutho du İran mawdacla d’Ruhani u Macron drışlın bu telefon i aykanoyutho d’Lebnon wu qyomo du nukleer.

Megabo hreno, u tboco froso d’Rusya mawdacle du rişqutno Vlademir Putin drışle cam Macron i aykanoyutho d’Lebnon wa dawsat du snodo dgımiqadım l’Lebnon bıthır mu furqoco d’Beyrut. Bebzabno, Putin ba esore dhawile cam Macron bu telefon, makadle d’Mosko ksındo u şroyo folitiqoyo du kriz d’Lebnon, u dlowelın mudaxala ba sebwotho gawoye du athrano.