Madhlum Cabde makadle du tukoso dı Dacış qento dkımhadıd la’Suriye kulle

SURIYA – U rişono gawonoyo d’QASAD Madhlum Cabde bi maqırhonutho dıfrısle bi dafo d’X mırle “bıthır mu gedşo mahişono dhawi bi cito d’Mor Alyas bı Darımsuq, kımqadamno buyoye lebonoye la yaqrotho da debhe, ukım’akadno i awyuthaydi acmaye bu haşano u rabo”. 

Cabde makadle ste da Mşihoye kıtlın u zedqo dcayşi b’şlomo ubı mşaynutho b’gawıd du athraththe, dlo zuctho udlo tehdid, u grışle u zuhoro cal Dacış dkıtyo qento dkımhadıd a’Suriye kulle, mawxa ste u nfoqo mqabıl dide wolitho athronoytoyo u sniqoytoyo li hdoyutho da fulhone. 

Bebzabno, Cabde makadle dıklozım b’qaşyutho dımdawım u ağuno mqabıl dı Dacış laşan dmisım u sutoro d’Suriya udu camayda. 

Mxasra hreto, i konfedraliye da tukose du kenşo demoqratoyo du qlimo du garbiyo udu madınho d’Suriya, bu buyono dıfrısla mahwela awyutho noşoyto cama yaqrotho da debhe mdinoye du furqoco marıhbono dhawi bi cito d’Mor Alyas bı Darımsuq. İ konfedraliye mawdacla ste du hçomano gunho yo dıkdoyış a’timoyotho noşoye u kenşoye uda n’axlaq, ukıtle u nişo dmımhe darbo li ciyeşe mşawtafto u mgawanto dkımmathlo u jawhar di hiyoyutho d’Suriya. 

Camgabıdathe, u lumodo Maşılmono demoqratoyo du garbiyo u madınho d’Suriya krıhle u furqoco di cito, u mawdacle dkıtyo gunho marıhbono. U lumodo Maşılmono demoqratoyo bu buyono dıfrısle makadle ste dkıtyo mqabıl dkul şıkıl du cnufyo udi tuhmonoyutho mayna mabuco dhuyo.