Madhlum Cabde sımle qroyto li mdabronutho hathto dı Darımsuq dsaymo i wolitho dıknıflo acla, dmitaklın a’hçome calu garbiyo d’Suriya
U rişono gawonoyo da haylawotho d’Suriya demoqratoyto d’QASAD general Madhlum Cabde, sımle qroyto li şultonutho zabnoyto dı Darımsuq, dsaymo hboso cala grube mzayne noqufe dı Turkiya, bnişo dmaklın a’hçomaththe cala haylawotho d’QASAD. M’gabo hreno, a’mharbone d’QASAD bu funoyo dhulın lu gayso Turkoyo ula çatawiyayde bu garbiyo d’Suriya, madrelın arbac tayisyotho Turkoye dlo pilot ba gbine du qrobo du masxoro dı Tışrin ud’Qaraqozaq.
GARBAY-MADINHO D’SURIYA – U rişono gawonoyo da haylawotho d’Suriya demoqratoyto d’QASAD general Madhlum Cabde, sımle qroyto li mdabronutho hathto dı Darımsuq dsaymo i wolitho dıknıflo acla, dmitaklın a’hçome calu garbiyo d’Suriya.
Cabde sımle i qroytathe bu zabno di mıştawtafonuthayde lu lqoyo d’Suriya du diyalog athronoyo dımtayıb bi mditho d’Raqqa mu qentrun d’Rojava da buhone bi mıştawtfonutho d’folitiqoye ma fenyotho mşahılfe d’Suriya.
Cabde bi maqırhonuthayde mırle ste “ahna b’fusqono kamilona dımdawmi a’bazare cam Darımsuq, ubi qadmoyutho di tahraztaydan dmitaklın a’hçome dı Turkiya yo. I wolitho dı Darımsuq yo dsaymo hboso cala grube mzayne laşan dmaklın a’hçomaththe cala genyotho du garbiyo udu madınho d’Suriya”.
M’gabo hreno, a’haylawotho d’Suriya demoqratoyto d’QASAD madrelın athmıl arbac tayisyotho dlo pilot du gayso kaboşo dı Turkiya bu funoyo dhulın la hçome dsimi athmıl cal zıd m’9 qıryawotho u şırke di çmanto ba gbine du qrobo du masxoro dı Tışrin, d’Qaraqozaq, dı Dayr (H)afer ud’Cayn Cisa bu qlimo du garbiyo udu madınho d’Suriya.
Bu buyono dıfrısle adyawma u qentrun du tboco froso d’QASAD, mawdacle ste da haylawotho d’Suriya demoqratoyto maklelın a’hçome dsimi athmıl mi xasra dı Turkiya uma grube noqufayda ba n’arbıco gbinani du qrobo.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
