Sim u futoho di cito d’Madinho d’Othuroye b’Hollanda

ZEIST, Hollanda – I qadişutho du fatıryarxo di cito d’Madınho d’Othuroye bu Ciraq ubıbritho Mor Awa Tlithoyo Roel, mrayşanle yawme d’Huşabo dşaficina u zawho du futoho ruşmoyo udu qudoşo du madhıbho di cito hathto d’Mor Bınyamen Şamcun bi mditho d’Zayst bu athro d’Hollanda. I citathe d’Mor Bınyamen kmıhşowo i cito trayonitho di marcitho du macırbo d’Urifi dıkmiqadşo bu yarhano. 

Lu zawho du futoho mıştawtafle u rişono di marcitho d’Australia, d’Newziland ud’Lebnon hasyo Mor Melis Zayya dkıtyo bebzabno u wakilo fatıryarxoyo gawonoyo, u efesqufo d’Nuhadra ud’Ninwe Mor Apres Yuxanna, u efesqufo d’Viktoria udı Newziland Mor Bınyamen Eliya wu efesqufo du macırbo d’Urifi Mor Oraham Yuxannes. 

Lu zawho du futoho mıştawtafle ste rişone u mathlone da citotho du camaydan b’Hollanda baynothaye u efetrufo fatıryarxoyo di marcitho d’Hollanda di cito Suryoyto Ortodoksoyto hasyo Mor Polikarpos Awgin Aydin, cama hadome du ikliros u mşale mi mdabronutho gawoyto d’Zayst u kunoşo rabo ma n’abne di cito d’Madınho d’Othuroye dıkhoyın b’Hollanda ud’athın m’athrawotho mşahılfe dıbritho. 

İ cito d’Mor Bınyamen Şamcun di mditho d’Zayst d’Hollanda şqilowa bi şato da 2024 bi netiçe da fulhone dsımwole u efesqufo Mor Oraham Yuxannes wu kohno di marcitho qaşişo Şamcun Şamcun ubi mcadronutho da mhaymne an’abne di cito d’Madınho d’Othuroye dkıtne b’Hollanda. İ marcithathe ste mşatsowa bi şato da na’1997.