05/03/2025

Qale bu kongre di amrekia bu zabno du mamlo di Donald Trump

Bıthır şeth şabe bi wolitho xıd rişono d’Amerika u dmıdle şişaltho d’fusqone u dhuwle amro, sımle Donald Trump u mamlayde u qamoyo bi kongre du athro. Elo u mamlano sim baroyo protesto. Heş meqım du Trump dımşare u mamlayde bi kongre, nafıq qale u bılbolo beyn da hadome du gabo da Demoqratoye udu gabo d’Trump da Qutnuthoye.

05/03/2025

WASINGTON – Trump sımle u mamlayde u qamoyo bi kongre d’Amerika xıd rişono du athro ubu mamlayde, mawdacle-d’Amerika daciro naqla hreto lu masırho, xlıqle zmomo ma hadome du gabayde da Qutnuthoye dımhalaqe slogane. Bıthır mdoyo d’100 fusqone, kımawdıc d’Trump dım’amanle naqla hreto i mşaynutho d’Amerika, u şuşotayde wu mafhum triso dkıtla.

Trump mırle; U şubhoraydan u tuxlono dacır, wu hulmo d’Amerikoyo rabtır me kull naqla’yo. Elo u mamlano d’Trump, makle’ste ma slogane uma mele da hadome du gabo Demoqratoyo. U hadomo d’Texas Al Green, jbir bi harayto bu hboso dmitawfıq mu salon cal d’rfıdle d’yotıw u dabıc dmakle u mamlo d’Trump. Bebzabno Trump m’akadle d’Amerika lıkducro mu şwolo du tecliyo du timo du gumruk mqabıl d’Kanada, Meksiko u Sin.

Maqbıl d’Urifi’ste, thımle Trump u Huyodo dmasrafle a zuzayde bu zwono du nafto udu ğaz d’Rusya ulo snıdlın bşıkıl makfıyono Ukraina. Mawdacle, d’Amerika’yo dmahıtla u masraf rabo bu qrobano d’Ukraina u mawdacle’ste dmatile egartho me Zelenskij u Ukraina ucdo hadırto’yo dmıdyo u qyomo da macdane elo lo mbahasle, en maklele i paketa folhoyto dgımşadarwo l’Ukraina aw lo.

Camathe’ste bi harayto du mamlayde, grışle naqla hreto u zuhoro cali sbutho di gzırto d’Grönland dkıtyo bi morutho d’Danmark. Lfuth i hzayto d’Trump, kibe dımşawşıt i gzırtathe zıd mu mede d’noşo kibe dmıftakır. A comure di gzırto, kıtte zedqo dımbayni u dactith d’ruhaye elo mırle’ste; Amerika kmıstaqbılo Grönland-Amerika kıtla sniqutho li gzırtathe hem leşan i mşaynutho du athro u hemste dbritho.